اسلام آباد: اے ٹی سی نے وزیر اعلیٰ کے پی علی امین گنڈاپور اور عمر تنویر بٹ کو اشتہاری قرار دے دیا۔
تفصیلات کے مطابق پی ٹی آئی رہنماؤں کی جانب سے بانی پی ٹی آئی کی نااہلی پر احتجاج کے کیس میں اے ٹی سی نے علی امین گنڈاپور اور عمر تنویر بٹ کو اشتہاری قرار دیا ہے۔
اشتہاری ملزمان کے خلاف کیس کی کارروائی دیگر ملزمان سے الگ کر دی گئی، عدالت نے غیر حاضر ملزمان کے وارنٹ گرفتاری جاری کر دیے۔ کیس کی سماعت انسداد دہشت گری عدالت کے جج طاہر عباس سپرا نے کی۔
عامر کیانی کے خلاف بھی اشتہاری قرار دیے جانے کا پراسس شروع کر دیا گیا۔ دوسری طرف پی ٹی آئی رہنما فیصل جاوید اور واثق قیوم انسداد دہشت گردی عدالت پہنچے، فیصل جاوید کی طرف سے دہشت گردی کی دفعات ختم کرنے کے لیے درخواست دائر کی گئی، جس پر عدالت نے دلائل طلب کر لیے، اور سماعت 15 جنوری تک ملتوی کر دی۔
اس کیس میں ملزمان کے خلاف تھانہ آئی نائن میں 2022 میں مقدمہ درج کیا گیا تھا۔
علی امین گنڈاپور کو بڑا ریلیف مل گیا
دوسری طرف پشاور ہائیکورٹ کے جسٹس ایس ایم عتیق شاہ اور جسٹس فہیم ولی پر مشتمل دو رکنی بینچ نے وزیر اعلیٰ خیبر پختونخوا کی الیکشن کمیشن نوٹس کے خلاف درخواست کی سماعت کی، اور الیکشن کمیشن کی جانب سے 20 نومبر کو علی امین گنڈاپور کو جاری کیے گئے نوٹس کو معطل کر دیا۔
عدالت نے الیکشن کمیشن کو وزیر اعلیٰ کے پی کے خلاف کارروائی سے روکتے ہوئے الیکشن کمیشن آف پاکستان کو نوٹس جاری کر دیا ہے۔
