کراچی : نارتھ کراچی کا رہائشی 7سالہ بچہ مدرسے جاکر واپس نہیں آیا، دوروز گزرنے کے باوجود کچھ پتہ نہ چل سکا، اغوا کا خدشہ ظاہر کیا جارہا ہے۔
اے آر وائی نیوز کی رپورٹ کے مطابق 7سالہ بچے صارم کو لاپتہ ہوئے دو دن گزر گئے پولیس نے مقدمہ درج کرلیا۔
اہل خانہ کی مدعیت میں دائر کیے گئے مقدمے کے متن میں کہا گیا ہے کہ صارم منگل کی دوپہر فلیٹ میں قائم مدرسے میں پڑھنے گیا اور لاپتہ ہوگیا۔
ایف آئی آر میں لکھا گیا ہے کہ قاری صاحب نے بتایا کہ صارم پڑھنے کے بعد اپنے بھائی کے ہمراہ واپس چلا گیا تھا، اہل خانہ نے بتایاکہ صارم جن فلیٹس میں رہتا ہے وہیں اندر مدرسہ بھی بنا ہوا ہے۔
گمشدہ بچے کے اہل خانہ کی مدعیت میں واقعے کا مقدمہ بلال کالونی تھانے میں درج کرا دیا گیا، اے آرت وائی نیوز سے گفتگو کرتے ہوئے صارم کی والدہ نے رو رو کر اپیل کی ہے کہ خدارا میرے بیٹے کو جو بھی لے کر گیا ہے واپس کردے۔
انہوں نے بتایا کہ میرا ایک بیٹا صارم سے بڑا ہے دونوں مدرسے ساتھ گئے تھے اور بڑا والا تو گھر آگیا لیکن صارم نہیں آیا، انہوں نے بتایا کی فلیٹوں میں سی سی ٹی وی تو لگے ہیں لیکن اس وقت لائٹ نہیں آرہی تھی۔
یاد رہے کہ گزشتہ سال گولیمار، لیاری اور نارتھ ناظم آباد میں کم عمر بچے کھلے میں ہول میں گر کر لاپتہ ہوگئے تھے۔
واضح رہے کہ کراچی میں آئے روز بچوں کے نالوں اور گٹروں میں گر کر جاں بحق ہونے کے واقعات رپورٹ ہوتے ہیں لیکن متعلقہ حکام اور ادارے روایتی بیانات اور اقدامات پر ہی اکتفا کرتے ہوئے اگلے حادثے کی خبر انتظار کرتے ہیں۔
