ابوظہبی: متحدہ عرب امارات نے عام شہریوں کیلیے ڈرونز کے استعمال پر عائد مشروط پابندی ختم کر دی ہے، جو 7 جنوری 2025 سے نافذ العمل ہوچکی ہے۔
تفصیلات کے مطابق متحدہ عرب امارات نے شہریوں کو ڈرون کیمرہ اڑانے کی اجازت دے دی ہے، تاہم اس کیلئے کچھ شرائط پر عمل درآمد لازمی ہے۔
متحدہ عرب امارات کی حکومت نے قواعد و ضوابط کے تحت عام لوگوں کو انفرادی طور پر ڈرون کیمرہ کے استعمال کی مشروط اجازت دے دی ہے۔
گلف نیوز کی رپورٹ کے مطابق یو اے ای کی وزارت داخلہ کا کہنا ہے کہ عام شہری سول ایوی ایشن اتھارٹی اور نیشنل کرائسز کنٹرول اینڈ مینجمنٹ اتھارٹی کی اجازت سے متعلقہ ایپ اور ویب سائٹ پر رجسٹریشن کے بعد ڈرون کا استعمال کرسکتے ہیں۔
ایسے افراد جو ڈرونز، گلائڈنگ اور ونڈ سرفنگ کے شوقین ہیں اور اپنا شوق جاری رکھنا چاہتے ہیں، انہیں اس کے لیے باقاعدہ اجازت نامہ حاصل کرنا ہوگا۔
وزارت داخلہ کی ہدایت کے مطابق ڈرون کیمرہ اڑانے کے شوقین افراد متعلقہ ایپ ’یو اے ای ڈرونز‘ یا ڈرونز کی ویب سائیڈ پر اکاؤنٹ بنانے کے بعد اس میں اپنی معلومات شامل کریں۔
یاد رہے کہ اس سے قبل یو اے ای میں عام شہریوں پر ڈرون اڑانے پر پابندی عائد تھی۔ ڈرون اڑانے کے لیے پرمٹ کا حصول لازمی امر تھا جو عام افراد کو جاری نہیں کیا جاتا تھا۔
وزارت داخلہ کا مزید کہنا ہے کہ وہ افراد جو ڈرون اڑانے کے شوقین ہیں، وہ کسی بھی ناخوشگوار صورتحال سے بچنے کیلئے مقررہ قوانین پر سختی سے عمل پیرا ہوں۔
شہریوں کے لیے قواعد و ضوابط
ڈرونز کا وزن زیادہ سے زیادہ 5 کلوگرام یا اس سے کم ہونا چاہیے۔ صرف "My Drone Hub” ایپ میں دیے گئے گرین زونز میں ڈرون اڑانے کی اجازت ہوگی۔ ڈرون کو جی سی اے اے کے ساتھ رجسٹر کروانا ضروری ہے، ڈرونز صرف دن کے وقت اور اچھے موسم میں اڑائے جا سکتے ہیں۔
یاد رہے کہ ڈرونز کو صرف تفریحی مقاصد کے لیے استعمال کیا جا سکتا ہے، تجارتی سرگرمیوں کے لیے نہیں۔
شہریوں کیلیے لازمی ہے کہ ہر پرواز سے پہلے ڈرون کا مکمل معائنہ کریں۔ عوامی مقامات یا کسی پبلک پراپرٹی کی حدود میں اڑانے سے گریز کریں، 5 کلومیٹر کے دائرے میں رہتے ہوئے ہوائی اڈوں، یا کسی کنٹرولڈ زون کے قریب ڈرون اڑانا ممنوع ہے۔
