بھارت میں گجرات کے احمد آباد کے ایک خانگی اسکول میں جمعہ کے روز 8 سالہ لڑکی گارگی راناپارا اچانک دل کا دورہ پڑنے سے چل بسی۔
غیر ملکی ذرائع ابلاغ کے مطابق گارگی صبح 8 بجے اسکول پہنچی تھی، لیکن سیڑھیاں چڑھتے وقت اسے سینے میں شدید درد شروع ہوگیا۔
رپورٹس کے مطابق معصوم طالبہ درد کی شدت کے باعث بینچ پر بیٹھ گئی اور چند سیکنڈز بعد زمین پر گر پڑی۔ اسکول اسٹاف نے فوری طور پر اسے اسپتال منتقل کیا، مگر ڈاکٹروں نے اسے مردہ قرار دے دیا۔
رپورٹ کے مطابق موت کی وجہ کارڈیک اریسٹ بتائی گئی ہے۔
اسکول کی پرنسپل کا اس حوالے سے کہنا ہے کہ اسٹاف نے فوری طور پر 108 ایمبولینس کو کال کی، لیکن ایمبولینس کے پہنچنے میں تاخیر ہو رہی تھی، جس کے باعث بچی کو اسٹاف کی گاڑی میں اسپتال منتقل کیا گیا، مگر ڈاکٹر اسے نہ بچا سکے۔
بھارتی میڈیا کے مطابق بچی کے والدین ممبئی میں مقیم ہیں، جبکہ وہ احمد آباد میں اپنے دادا دادی کے ساتھ رہتی تھی۔ پولیس نے واقعے کے بعد اسکول کا سی سی ٹی وی فوٹیج چیک کیا اور کرائم برانچ کی جانب سے بھی تحقیقات کی گئیں۔
ڈاکٹروں کے مطابق گارگی مکمل طور پر صحت مند تھی اور ابتدائی طور پر موت کی وجہ کارڈیک اریسٹ بتائی جارہی ہے، حتمی وجہ پوسٹ مارٹم رپورٹ کے بعد معلوم ہوگی۔
لاس اینجلس میں خوفناک آگ، 12ہزار مکان اور عمارتیں جل کر راکھ
واضح رہے کہ بھارت کے کرناٹک کے چامراج نگر ضلع کے سینٹ فرانسس اسکول میں بھی 8 سالہ لڑکی جان کی بازی ہار گئی۔
