لاہور: وزیر اعلیٰ پنجاب مریم نواز نے پاکستان کا پہلا ’پنجاب دھی رانی‘ پروگرام لانچ کر دیا۔ لاہور کے بہترین میرج ہال میں 51 اجتماعی شادیوں سے آغاز کر دیا گیا، نوبیاہتا جوڑوں میں پانچ کرسچن دولہا دلہن اور ایک اسپیشل جوڑا بھی شامل ہے۔
مریم نواز نے تقریب میں موجود نوبیاہتا جوڑوں کو فرداً فرداً مبارکباد دی۔ انہوں نے دلہنوں کو پیار اور اظہار شفقت کیا اور دعائیں دیں۔ تقریب میں مولانا ڈاکٹر مفتی محمد رمضان سیالوی اور بشپ لاہور ندیم کامران نے باری باری دعائیں کروائیں۔ نوبیاہتا دولہا دلہن کو وزیر اعلیٰ پنجاب کی طرف سے بیڈ میٹرس، کھانے پکانے کا سامان، ڈنر سیٹ اور دیگر سامان کے تحائف دیے گئے۔
یہ بھی پڑھیں: مریم نواز کی تصاویر ایڈٹ کر کے وائرل کرنے والے ہو جائیں خبردار!
وزیر اعلیٰ نے دھی رانی پروگرام سلامی کارڈ کی لانچنگ بھی کی۔ انہوں نے ہر دلہن سے اظہار شفقت کرتے ہوئے دھی رانی سلامی کارڈ بھی دیا۔ کارڈ کے ذریعے ہر نوبیاہتا جوڑا ایک لاکھ روپے سلامی حاصل کر سکے گا۔ دولہا دلہن اور تقریب کے شرکا کو محکمہ سوشل ویلفیئر کی جانب سے پرتکلف ظہرانہ بھی دیا گیا۔
مریم نواز نے نوبیاہتا جوڑوں کے ساتھ گروپ فوٹو بھی بنوایا اور تحفے کے طور پر ملنے والے سامان کا بھی معائنہ کیا۔ صوبے میں رواں سال میں مجموعی طور پر 3000 اجتماعی شادیاں کروائی جائیں گی۔ پہلے مرحلے میں 1500 اجتماعی شادیاں کروائی جا رہی ہیں۔
وزیر اعلیٰ کی ہدایت پر پروگرام کیلیے ایک ارب روپے کی خطیر رقم مختص کی گئی۔
انہوں نے لانچنگ تقریب سے خطاب کرتے ہوئے کہا کہ پروگرام کے تحت موجود بیٹیوں اور بیٹوں، والدین اور اہلخانہ کو دل کی گہرائیوں سے شادی کی مبارکباد دیتی ہوں، اللہ تعالیٰ آپ کو ہمیشہ خوش رکھے، دعا کے ساتھ میں بیٹیوں اور بیٹوں کی خوشیوں میں شامل ہونے کیلیے آئی ہوں۔
ان کا کہنا تھا کہ اللہ تعالیٰ میرے بیٹیوں اور بیٹوں کو آباد و شاد رکھے، نئی زندگی کی شروعات میں برکت ڈالے، دکھ سکھ کا ساتھی بنائے، بیٹیوں اور بیٹوں کی شادی میں شمولیت ایک جذباتی لمحہ ہے بے حد خوش ہوں، شادی بچوں اور والدین کیلیے ایک جذباتی لمحہ ہوتا ہے، دعا گو ہوں۔
مریم نواز نے کہا کہ جتنے آپ کے والدین خوش ہیں، آپ خوش ہوں، میں بھی آپ کی ماں ہوں، میں بھی خوش ہوں، اللہ تعالیٰ میرے بیٹیوں اور بیٹو ں کو سکھ اور چین والی زندگی دے۔
