پاک بحریہ کے جہاز پی این ایس یمامہ نے ترکیہ کی بندرگاہوں گلوچک اور اکساز کا دورہ کیا ہے۔
پاک فوج کے شعبہ تعلقات عامہ (آئی ایس پی آر) کے مطابق ترک بندرگاہ پہنچنے پر پاکستانی سفارت خانے کے عملے اور ترک بحریہ کے اعلیٰ حکام نے جہاز اور عملے کا استقبال کیا۔
گلوچک میں کمانڈنگ آفیسر کی ترک بحریہ کے فلیٹ کمانڈر اور گلوچک نیول بیس کے کمانڈر سے ملاقاتیں ہوئیں۔
آئی ایس پی آر کے مطابق قیام کے دوران ترکش نیوی فلیٹ کے ڈپٹی کمانڈر وائس ایڈمرل نے پی این ایس یمامہ کا دورہ کیا، ترکش نیوی فلیٹ کے ڈپٹی کمانڈر کو جہاز کی صلاحیتوں سے متعلق بریفنگ دی گئی۔
اس موقعے پر پی این ایس یمامہ اور ترک بحریہ کے جہازوں کے درمیان بحری مشق ماوی وطن کا انعقاد کیا گیا، مشق کا مقصد دونوں بحری افواج میں باہمی تعاون اور مشترکہ آپریشنز کی صلاحیت بڑھانا تھا۔
پاک فوج کے شعبہ تعلقاتِ عامہ (آئی ایس پی آر) کے مطابق پی این ایس یمامہ کا دورہ دونوں ممالک کے درمیان سفارتی اور بحری تعلقات کو فروغ دیگا۔
