بھارت میں مقامی خواتین کے ساتھ ساتھ اب دیگر ممالک سے آنے والی خواتین بھی ہراساں ہونے لگیں، بھارتی شہری کو روس سے تعلق رکھنے والی اپنی اہلیہ کے ساتھ ملک آنے کی بڑی قیمت چکانا پڑ گئی۔
غیر ملکی ذرائع ابلاغ کے مطابق بھارت کے شہر اُدے پور میں بھارتی شہری کی روسی اہلیہ کو ہراساں کرنے کی کوشش کی گئی۔
رپورٹس کے مطابق ایک بھارتی یوٹیوبر نے اپنی ویڈیو میں انکشاف کیا کہ کچھ مردوں کے ایک گروپ نے اُدے پور کے سٹی پیلس میں اس کی بیوی لیزا اور 2 سالہ بیٹے کا پیچھا کیا اور انتہائی نامناسب جملوں سے مخاطب کیا۔
رپورٹس کے مطابق متھیلیش بیک پیکر نامی شخص نے ہراساں کرنے کا یہ سارا واقعہ اپنے کیمرے میں ریکارڈ کرلیا اور بعد ازاں اس کی ویڈیو بھی سوشل میڈیا پر شیئر کر دی۔
ہراساں کرنے والے شخص کو متھیلیش بیک پیکر نے پولیس بلانے کی دھمکی بھی دی تاہم وہ کیمرے کے سامنے انکار کرتا رہا۔
بھارتی شہری کا اس حوالے سے کہنا تھا کہ سٹی پیلس کی سیکیورٹی نے میری مدد کرنے کے بجائے معاملہ رفع دفعہ کرنے کے لئے زور ڈالا۔
یو ٹیوبر نے بھارت میں خواتین کے ساتھ رویے، سیکیورٹی اور لوگوں کے خیالات کو بھی شدید تنقید کا نشانہ بنایا۔
روسی خاتون کو ہراساں کرنے کی ویڈیو سوشل میڈیا پر وائرل ہونے کے بعد اس واقعے پر تنقید اور غصے کا اظہار کیا جا رہا ہے۔
پڑوسیوں کے ہراساں کرنے پر نوجوان نے 4 بہنوں اور ماں کو قتل کردیا
واضح رہے کہ بھارت میں کئی غیر ملکی خواتین سیاحوں کے ساتھ بدتمیزی، ہراساں اور چھیڑ چھاڑ کے واقعات سامنے آ چکے ہیں۔ مگر انتظامیہ اس حوالے سے مناسب ایکشن لینے میں تاحال ناکام ہے۔
