کراچی کے علاقے نارتھ کراچی کے رہائشی بچے صارم کی ابتدائی پوسٹ مارٹم رپورٹ میں تہلکہ خیز انکشاف ہوا ہے۔
اے آر وائی نیوز کے مطابق کراچی کے علاقے نارتھ کراچی میں ٹینک سے صارم کی لاش ملنے کے کیس میں اہم پیش رفت ہوئی ہے، ابتدائی پوسٹ مارٹم رپورٹ کے مطابق ایس ایس پی اے وی سی سی انیل حیدر نے بچے سے زیادتی کی تصدیق کردی ہے۔
صارم کی گردن کی ہڈی ٹوٹی ہوئی تھی اور اسے گلا دبا کر قتل کیا گیا۔
ایس ایس پی کا کہنا ہے کہ صارم کو 5 روز قبل قتل کیا گیا تھا اور پھر لاش زیر زمین پانی کے ٹینک میں پھینکی گئی۔
مزید پڑھیں : صارم کی لاش کیسے ملی؟ اہم انکشاف سامنے آگیا
انیل حیدر کا کہنا ہے کہ پولیس نے شک کی بنا پر قریبی عزیز کو حراست میں لیا ہے، زیر حراست شخص کا ڈی این اے کروایا جارہا ہے۔
واضح رہے کہ اس سے قبل تفتیشی ذرائع کا کہنا تھا کہ اسپیشل انویسٹی گیشن یونٹ( سی آئی اے) نے صارم اغوا کیس کی تفتیش کے لیے بیت الانعم پر چھاپہ مارا، چھاپے کے دوران 2 مشتبہ افراد کو حراست میں لے لیا۔
تفتیشی ذرائع کا بتانا تھا کہ سی آئی اے ٹیم سراغ رساں کتے لے کر پہنچی تھی، خالی فلیٹس کو بھی مکمل طور پر سرچ کیا گیا جبکہ ایک فلیٹ سے بیڈ شیٹ بھی فارنزک کے لیے لی گئی۔
’صارم کو جو لے گیا اسے دروازے پر چھوڑ دے کچھ نہیں بولیں گے‘
یاد رہے 7 جنوری کو بچہ اپنے ہی فلیٹ سے لاپتہ ہوا تھا، جو بھائی کے ہمراہ اپارٹمنٹ میں موجود مسجد کے مدرسے میں پڑھنے گیا تھا جس کے بعد بڑا بھائی گھر آگیا لیکن صارم نہیں آیا تھا۔
صارم کی گمشدگی کے وقت علاقے میں بجلی نہیں تھی جس کی وجہ سے پولیس کو سی سی ٹی وی ویڈیو نہیں ملی تھی، اس واقعے کے بعد بچے کے والدین سے آن لائن پیسے بھیجنے کا تقاضہ بھی کیا گیا تھا۔
جس کے بعد پولیس حکام نے بچے کی بازیابی کے لیے ٹیمیں تشکیل دے دی تھی اور کہا تھا کہ مختلف زاویوں سے کیس پر کام کررہے ہیں، بظاہر لگتا ہے کہ کسی جاننے والے کا ہی کام ہے، لیکن 11 روز بعد صارم کی لاش قریبی ٹینک سے ملی تھی۔
