امریکا کے نو منتخب صدر ڈونلڈ ٹرمپ نے اعلان کیا ہے کہ وہ 500 ارب ڈالر مالیت کے اسٹار گیٹ آرٹیفیشل انٹیلی جنس (اے آئی) پروجیکٹ کا آغاز کریں گے۔
یہ بات انہوں نے وائٹ ہاؤس میں پہلی میڈیا بریفنگ کے دوران صحافیوں سے گفتگو کرتے ہوئے کہی، انہوں نے کہا کہ اوپن اے آئی، سافٹ بینک اور اوریکل اے آئی میں 500 ارب ڈالر کی سرمایہ کاری کریں گے اس اقدام سے ایک لاکھ ملازمتیں پیدا ہوں گی۔
امریکی صدر ڈونلڈ ٹرمپ کا کہنا تھا کہ اسٹار گیٹ فوری طور پر اے آئی انفرا اسٹرکچر کی تعمیر پر کام شروع کردے گی۔
صدر ڈونلڈ ٹرمپ نے کہا کہ ٹک ٹاک کے مالک سے میری ملاقات ہوئی ہے،اگر ایلون مسک ٹک ٹاک خریدنا چاہیں گے تو ڈیل کروا دوں گا۔
صدر ٹرمپ نے بائیڈن انتظامیہ کی انتقامی کارروائی کانشانہ بننے والے افراد کو معافی دینے کا بھی اعلان کیا، انہوں نے کہا کہ بائیڈن نے اپنی فیملی اور مجرموں کو صدارتی معافی دی۔
صحافیوں کی جانب سے روس یوکرین جنگ سے متعلق پوچھے گئے ایک سوال کے جواب میں صدر ٹرمپ کا کہنا تھا کہ اگر میں اس وقت صدر ہوتا تو یوکرین کی جنگ شروع ہی نہ ہوتی۔
ان کا مزید کہنا تھا کہ کینیڈا سے لاکھوں کی تعداد میں لوگ امریکا آریے ہیں اور بھاری مقدار میں منشیات ابھی لائی جارہی ہے۔
مزید پڑھیں : پیوٹن روس کو تباہ کررہے ہیں، ٹرمپ
علاوہ ازیں نومنتخب امریکی صدر ڈونلڈ ٹرمپ نے کہا ہے کہ یوکرین جنگ کی وجہ سے پیوٹن روس کو تباہ کررہے ہیں، انہیں مذاکرات کی میز پر آنا چاہیے۔
ٹرمپ نے کہا کہ میرے پاس یوکرین تنازع کے حل کیلئے ابھی وقت ہے، یوکرین جنگ جاری رہی تو روس بڑی مصیبت میں پڑجائے گا۔
ڈونلڈ ٹرمپ نے کہا کہ پیوٹن کو یوکرین جنگ کے خاتمے اور روس کو بچانے کیلئے ایک معاہدہ کرنا چاہیے، یوکرین کے صدر زیلنسکی بھی جنگ کے خاتمے کیلئے معاہدہ چاہتے ہیں۔
