ترکیہ کے مشہور سیاحتی مقام کے ہوٹل میں خوفناک آتشزدگی کا واقعہ گزشتہ روز پیش آیا جس میں مرنے والوں کی تعداد 76 ہوگئی جبکہ 41 افراد زخمی ہوگئے۔
عالمی خبر رساں ادارے کے مطابق یہ آگ ترکیہ کے صوبے بولو میں کے علاقے کارتالکیا کے 12 منزلہ ریزروٹ ہوٹل کی چوتھی منزل میں لگی تھی، اس ہوٹل میں 238 مہمان ٹھہرے ہوئے تھے۔
رپورٹ کے مطابق بارہ منزلہ عمارت میں آگ ریسٹورنٹ میں لگی، لکڑی سے بنی عمارت میں آگ تیزی سے پھیلتی چلی گئی، لوگوں نے جان بچانے کے لیے کھڑکیوں سے چھلانگیں لگائیں، فائر فائٹرز نے بارہ گھنٹے جدوجہد کے بعد شعلے ٹھنڈے کیے۔
رپورٹ کے مطابق پولیس نے ہوٹل مالک سمیت نو افراد کو گرفتار کرلیا ہے، دوسری جانب ترک صدر طیب اردوان نے واقعے پر افسوس کا اظہار کیا ہے، انہوں نے کہا کہ واقعے کی مکمل تحقیقات کی جائیں گی، ذمہ دار افراد کو انصاف کے کٹہرے میں لایا جائے گا۔
