کراچی : پاکستان پیپلزپارٹی (پی پی پی) کے چیئرمین بلاول بھٹو زرداری امریکا جاتے جاتے ایئر پورٹ سے اچانک واپس اپنی رہائش گاہ پہنچ گئے۔
امریکی صدر ڈونلڈ ٹرمپ کے صدارتی ناشتے میں شرکت کے لیے روانگی کے لیے کراچی ائیرپورٹ پہنچنے کے بعد چیئرمین پی پی اچانک واپس بلاول ہاؤس روانہ ہوگئے۔
اے آر وائی نیوز کی رپورٹ کے مطابق چیئرمین پی پی کو امریکا جانے کے لیے بذریعہ دبئی روانہ ہونا تھا۔
ذرائع کا کہنا ہے کہ دبئی روانگی کیلیے بلاول بھٹو زرداری اور ان کے سیکیورٹی اسٹاف کی بورڈنگ بھی ہوچکی تھی کہ روانگی اچانک ملتوی کردی گئی۔
ذرائع کے مطابق بلاول بھٹو زرداری کو بذریعہ دبئی امریکا روانہ ہونا تھا جہاں انہوں نےامریکی صدر ڈونلڈ ٹرمپ کے صدارتی ناشتے میں شرکت کرنا تھی۔
اس حوالے سے اے آر وائی نیوز نے جب بلاول ہاؤس ذرائع سے رابطہ کیا تو وہاں سے بھی کسی قسم کا تبصرہ کرنے سے کتراتے ہوئے خاموشی اختیار کی گئی۔
مزید پڑھیں : حکمران مرضی سے فیصلے کریں تو پورا نظام گر جاتا ہے، بلاول بھٹو
یاد رہے کہ گزشتہ ہفتے اسلام آباد میں ایک تقریب سے خطاب کرتے ہوئے چیئرمین پیپلزپارٹی کا کہنا تھا کہ حکمران مرضی سے فیصلے کریں تو پورا نظام گر جاتا ہے۔
چیئرمین پیپلزپارٹی بلاول بھٹو کا کہنا تھا کہ حکومت ایسے پالیسیاں بناتی ہے جیسے اس کے پاس دو تہائی اکثریت ہو۔
انہوں نے کہا کہ جب اتفاق رائے کے بغیر فیصلے ہوں تو ان پر عمل کرنا مشکل ہوجاتا ہے، حکومت منتخب نمائندوں کی مشاورت سے پالیسی بنائے تو بہتر ہوگا۔
