اسلام آباد : پی ایف یو جے کے رہنما لالہ اسد پٹھان کا کہنا ہے کہ راتوں رات کالے قوانین بنا کر زباں بندی شروع کردیں گے تو پورا میڈیا ہی بند کردیں۔
تفصیلات کے مطابق پی ایف یو جے کے رہنما لالہ اسد پٹھان نے اے آر وائی نیوز کے پروگرام ‘دی رپورٹرز’ میں گفتگو کرتے ہوئے کہا کہ متنازع پیکا ایکٹ کالا قانون ہے کسی صورت قبول نہیں کریں گے ، کہا گیا تھا کہ متنازع ایکٹ پر صحافی برادری سے مشاورت ہوگی لیکن صحافی برادری سے مشاورت کیے بغیر متنازع قانون پیش کردیا گیا۔
لالہ اسد پٹھان کا کہنا تھا کہ ہم کسی قانون کیخلاف نہیں لیکن مشاورت سے بننے چاہئیں، متنازع پیکا ایکٹ جیسے قوانین بنانے ہیں تو ایک ہی آ رڈر کرکے میڈیا بند کردیں ، متنازع ایکٹ کے ذریعے کل کسی بھی صحافی کو 3 سال کیلئے جیل میں ڈال دیا جائے گا۔
انھوں نے کہا کہ ہمیں کچھ وقت تو دیں کہ متنازع ایکٹ پر بحث کریں، راتوں رات متنازع ایکٹ منظور کرنے کی منطق سمجھ نہیں آتی۔
پیپلزپارٹی کے حوالے سے رہنما پی ایف یو جے کا کہنا تھا کہ پیپلزپارٹی توہمیشہ سے آزادی اظہار رائے پر آواز اٹھاتی رہی ہے، پیپلزپارٹی کےرہنما اور کارکنان متنازع ایکٹ کی مخالفت کرتے ہیں، معلوم نہیں پیپلزپارٹی قیادت کو متنازع پیکا ایکٹ کالا قانون نہیں لگتا، صدر آصف زرداری اب بھی متنازع پیکا ایکٹ پر اعتراض لگا سکتے ہیں۔
انھوں نے مزید کہا کہ یہ لوگ اپوزیشن میں تھے تو ہمارے ساتھ آواز اٹھاتے تھے، معلوم نہیں اقتدار میں آکریہ لوگ خود ایسے کالے قوانین بناتے ہیں، اپوزیشن میں تو یہ ایسی باتیں کرتے تھے کہ آزادی صحافت کے یہ داعی ہیں، اقتدار میں آکر ان کے رویے ہی تبدیل ہو جاتے ہیں۔
