کراچی پولیس چیف جاوید عالم اوڈھو نے زمینوں پر قبضوں کے واقعات میں کمی کا دعویٰ کرتے ہوئے کہا ہے کہ 2023 کے مقابلے میں زمینوں پر قبضے کی کم شکایات ملی ہیں۔
جاوید عالم اوڈھو نے اپنے ایک بیان میں کہا کہ 2024 میں زمینوں پر قبضے اور تجاوزات کی شرح میں کمی ہوئی، قبضے و دیگر معاملات پر پولیس افسران پر بھی مقدمات ہوئے اور سزائیں ہوئیں۔
انہوں نے بتایا کہ پولیس میں جرائم سے متعلق زیر وٹالیرنس ہے، یہ نہیں کہتا کہ آباد نے جھوٹی شکایات لگائی ہیں، قبضے کی آباد کی شکایات کسی خاص بلڈر سے متعلق ہو سکتی ہے۔
’2024 میں زمینوں پر قبضے کی شکایات جلد منظر عام پر لاؤں گا۔ لینڈ گریبنگ نہ ہونے کے برابر ہے۔ محکمہ پولیس میں جتنی سزائیں ہیں کہیں اور نہیں۔ پولیس حکومت کا ذیلی شعبہ ہے لیکن کوئی سیاسی دباؤ نہیں ہے۔‘
اگست 2024 میں سندھ میں 24 ہزار ایکڑ جنگلات کی زمین پر بااثر شخصیات کے قبضے کا انکشاف ہوا تھا۔
کراچی میں ایک شہری علی نواز انڑ نے سندھ ہائیکورٹ میں متفرق درخواست دائر کی تھی جس میں انہوں نے کہا تھا کہ گمبٹ سوبھودیرو میں جنگلات کی 24 ہزار ایکڑ زمین پر با اثر شخصیات کا قبضہ ہے۔
سندھ ہائیکورٹ نے محکمہ جنگلات و دیگر کو نوٹس جاری کر دیے تھے۔ عدالت نے آئندہ سماعت پر سیکریٹری قانون اور جنگلات سے رپورٹ بھی طلب کر لی تھی اور کہا تھا کہ اگر آئندہ سماعت تک پیش رفت نہ ہوئی تو احکامات جاری کریں گے۔
درخواست گزار کا کہنا تھا کہ بااثر شخصیات جنگلات کی زمین پر کاشت کاری کر کے لاکھوں کما رہے ہیں۔
سیکریٹری جنگلات اینڈ وائلڈ لائف ڈیپارٹمنٹ عدالت میں پیش ہوئے تھے اور کاربن کریڈٹ کی مد میں غیر ملکی کمپنیوں کی جانب سے ملنے والے فنڈز کی رپورٹ پیش کی گئی تھی۔
عدالت نے سیکریٹری جنگلات کو زمینوں پر قبضے ختم کرانے کیلیے تمام اقدامات کی ہدایت کی تھی۔
عدالت نے کہا تھا کہ جنگلات کی زمینوں سے قبضہ ختم کرانے کیلیے رینجرز اور سیشن جج کی مدد لی جائے، کے پی اور پنجاب میں جنگلات کی زمین کی حفاظت کے لیے فورس موجود ہے۔
سیکریٹری جنگلات نے عدالت کو بتایا تھا کہ قانون میں ترمیم کر کے جنگلات کی حفاظت کیلیے فورس بنائی جا رہی ہے۔
