شام کے نئے صدر احمد الشرع نے عبوری حکومت کے قیام کا اعلان کردیا۔
غیر ملکی میڈیا رپورٹ کے مطابق شام کے نئے صدر احمد الشرع نے اپنے پہلے باضابطہ خطاب میں کہا ہے کہ میں بطور صدر ایک جامع عبوری حکومت کی تشکیل دے رہا ہوں جس میں سبھی طبقوں کی نمائندگی ہوگی۔
احمد الشرع کہنا ہے عبوری حکومت ملکی اداروں کا قیام عمل میں لاتے ہوئے نظم و نسق چلائے گی اور غیر جانبدارآنہ انتخابات کرائے گی، مختصر قانون ساز ادارہ قائم کیا جائے گا جو نئے انتخابات تک کام کرتا رہے گا۔
انہوں نے اپنے پہلے خطاب میں یہ اعلان بھی کیا ہے کہ وہ آنے والے دنوں میں ایک کمیٹی قائم کریں گے جو قومی مکالمے کے لیے ایک کانفرنس کا اہتمام کرے گی، جس میں ملک کے سیاسی مستقبل کا پروگرام ترتیب دیا جائے گا۔
انہوں نے یہ بھی کہا ایک آئینی اعلامیہ کے تحت نئے آئین کی ترتیب کا اہتمام کیا جائے گا تاکہ ملک کے نظام کو ایک قاعدے کے ساتھ آگے بڑھایا جا سکے۔
واضح رہے کہ شامی صدر نے 29 جنوری کو صدارت سنبھالی ہے۔ احمد الشرع نے ‘ھیتہ التحریر الشام’ کے سربراہ کے طور پر 8 دسمبر 2024 کو بشارالاسد کی حکومت کا تختہ الٹ کر اقتدار اپنے ہاتھ میں لیا تھا۔ 13 سال کی خانہ جنگی کے بعد شام میں یہ بڑا واقعہ تھا۔
