غزہ میں جنگ بندی معاہدے کے باوجود اسرائیلی فوج کی جانب سے بربریت کا سلسلہ جاری ہے جبکہ اسرائیلی فوج نے فلسطین میں مغربی کنارے کے شہر ہربون میں شادی کی تقریب کے دوران دولہا کو حراست میں لے لیا۔
بین الاقوامی خبر رساں ادارے کی رپورٹ کے مطابق سوشل میڈیا پر اسرائیلی فوج کی شادی کی تقریب میں چھاپے کی ویڈیو سوشل میڈیا پر گردش کررہی ہے، جس میں دیکھا جاسکتا ہے کہ قابض فوج نے تقریب کے دوران دولہا کو گرفتار کرلیا۔
سوشل میڈیا پر وائرل ہونے والی ویڈیو میں دیکھا جاسکتا ہے کہ ایک مقامی ہال میں شادی کی تقریب جاری ہے، جس میں بڑی تعداد میں مہمان بھی موجود ہیں، اس دوران اسرائیلی فوج اچانک ہال میں داخل ہوتی ہے اور دولہا کو زبردستی اپنے ساتھ لے جاتی ہے۔
View this post on Instagram
اس کے علاوہ اسرائیلی فورسز نے طولکرم اور جنین پناہ گزین کیمپ میں عمارتوں کو دھماکے سے اڑا دیا، ڈرون سے بمباری کی گئی جس کے نتیجے میں مزید 2 فلسطینی شہید ہوگئے۔
واضح رہے کہ اسرائیل حماس کی جانب سے 3 یرغمالیوں کے بدلے آج 90 فلسطینی قیدیوں کو رہا کرے گا۔
فلسطینی قیدیوں کے میڈیا آفس کے مطابق عمر قید کی سزا پانے والے 9 فلسطینی قیدیوں اور 81 طویل مدتی قیدیوں کو آج اسرائیلی جیلوں سے رہا کر دیا جائے گا۔
اسرائیلی وزیر اعظم کے دفتر کے ایک بیان کے مطابق اسرائیل نے حماس سے ایک فہرست حاصل کی ہے جس میں تین اسیروں کے نام ہیں جن کی غزہ میں کل رہائی متوقع ہے۔
54 سالہ فرانسیسی اسرائیلی اوفر کالڈیرون کو 7 اکتوبر 2023 کو حماس کے زیر قیادت حملے کے دوران نیر اوز کی اسرائیلی بستی سے اس کے دو بچوں کے ساتھ یرغمال بنایا گیا تھا۔ بچوں کو نومبر 2023 میں رہا کیا گیا تھا۔
65 سالہ امریکی اسرائیلی کیتھ سیگل کو 7 اکتوبر کو ہونے والے حملے کے دوران اس کی اہلیہ ایویوا کے ساتھ کفار عزا بستی سے لے جایا گیا تھا۔ ان کی اہلیہ کو نومبر 2023 میں رہا کر دیا گیا تھا۔
ایران کو خفیہ معلومات دینے والے اسرائیلی فوجی پکڑے گئے
35 سالہ اسرائیلی ارجنٹائنی یارڈن بیباس کو نیر اوز سے غزہ لے جایا گیا۔ حملے کے دوران ان کی بیوی اور دو بچوں کو بھی الگ الگ یرغمال بنا لیا گیا۔ حماس نے دعویٰ کیا ہے کہ بیباس کی بیوی اور بچے، جنہیں غزہ کے اس سے مختلف علاقے میں رکھا گیا تھا، جنگ کے دوران اسرائیلی بمباری سے مارے گئے تھے۔
