امیر جماعت اسلامی پاکستان حافظ نعیم الرحمان کا کہنا ہے کہ مولانا فضل الرحمان اور پی ٹی آئی نئے الیکشن کی بات کرتے ہیں اور ہم کہتے ہیں نئے الیکشن نہیں پہلے فارم 47 پر بات ہو۔
حافظ نعیم الرحمان نے اپنے ایک بیان میں کہا تھا کہ 8 فروری قومی تاریخ کا بدترین دن ہے جس میں دھاندلی کے ریکارڈ ٹوٹے، دھاندلی 2018 میں بھی ہوئی تھی آر ٹی ایس بٹھایا گیا تھا لیکن 2024 میں دھاندلہ ہوا ہے سارے ریکارڈ ٹوٹ گئے تھے۔
یہ بھی پڑھیں: اسمبلیوں میں جانے والے نمائندے 90 فیصد کھرب پتی ہوتے ہیں، حافظ نعیم الرحمان
انہوں نے کہا کہ کراچی میں ڈھائی ہزار ووٹ لینے والے کو 1 لاکھ ووٹ دے دیے، ایم کیو ایم پاکستان کو ایک لاکھ ووٹ نہیں پڑا 22 قومی اسمبلی کی سیٹیں دے دیں، مولانا فضل الرحمان سے سوال بنتا ہے کہ ان کے ساتھ دھاندلی کہاں ہوئی؟
مہنگائی پر بات کرتے ہوئے حافظ نعیم الرحمان نے کہا کہ ہر چیز کی قیمت بڑھ رہی ہے لیکن وزیر اعظم شہباز شریف کہتے ہیں مہنگائی کم ہو رہی ہے، ن لیگ، پیپلز پارٹی اور ایم کیو ایم نے مل کر اپنی تنخواہوں میں اضافہ کروا لیا، آئے ہوئے قوانین پر او کے کر دیتے ہیں جس پر اختلاف دکھانا ہوتا ہے وہاں دکھا دیتے ہیں۔
امیر جماعت اسلامی پاکستان نے کہا کہ کہا جاتا ہے عمران خان کو سیاسی بنیادوں پر گرفتار کیا گیا ہے اگر سیاسی بنیادوں پر گرفتار کیا ہے تو مذاکرات کس بات پر ہو رہے ہیں؟ کسی نے 35 سال لوٹ مار کی تو 35 سال کا حساب دے، کسی نے ساڑھے 3 سال حکومت کی تو وہ اپنا حساب دے۔
ان کا مزید کہنا تھا کہ سندھ میں پیپلز پارٹی نہیں پی ڈی ایم حکومت کر رہی ہے، کے پی میں صرف پی ٹی آئی حکومت ہے باقی ہر جگہ پی ڈی ایم ہے، سندھ میں جو اساتذہ احتجاج کر رہے ہیں ہم ان کے ساتھ ہیں، بیوروکریٹ کا کوئی حق نہیں کہ انہیں مسلط کر دیا جائے۔
