جی ایچ کیو حملہ کیس میں مزید دو گواہان کے بیانات قلمبند کرلیے گئے ہیں، 31 مقدمات میں بشریٰ بی بی کی عبوری ضمانت میں توسیع کردی گئی۔
تفصیلات کے مطابق انسداد دہشت گردی کی عدالت راولپنڈی نے 26 نومبر کے 31 مقدمات میں بشریٰ بی بی کی عبوری ضمانت میں 8 فروری تک توسیع کرتے ہوئے انھیں ان مقدمات میں شامل تفتیش کرنے کی ہدایت کردی ہے۔
9 مئی جی ایچ کیو حملہ کیس اور بشریٰ بی بی کی ضمانت کی درخواستوں پر سماعت انسداد دہشت گردی عدالت راولپنڈی کے جج امجد علی شاہ نے کی۔
جی ایچ کیو حملہ کیس میں دو گواہان کانسٹیبل عمران اور ایس ڈی او اویس شاہ کے بیان قلمبند کیے گئے، گواہ عمران نے جی ایچ کیو حملہ کیس کی 15 تصاویر عدالت میں پیش کیں جبکہ گواہ اویس شاہ کی جانب سے جی ایچ کیو کے گیٹ پر توڑ پھوڑ کی تخمینہ رپورٹ عدالت میں پیش کی گئی۔
رپورٹ میں بتایا گیا کہ جی ایچ کیو گیٹ پر توڑ پھوڑ سے 7 لاکھ 80 ہزار روپے کا نقصان ہوا، پراسیکوشن کی جانب سے جی ایچ کیو حملہ کیس کے شواہد پر مشتمل 13 یو ایس بی عدالت میں جمع کروا دی گئی۔
جج امجد علی شاہ نے ہدایت کی کہ جو وکلا صفائی یو ایس بی کاپیاں حاصل کرنا چاہیں وہ عدالت سے حاصل کر سکتے ہیں۔
عدالت نے ایف ائی اے پیمرا انٹرنل سیکیورٹی اور پی ائی ڈی کی اضافی رپورٹس ملزمان کو فراہم نہ کیے جانے پر ایس ایس پی آپریشنز کو طلب کیا تھا تاہم وہ سماعت کے دوران عدالت میں پیش نہ ہو سکے۔
عدالت نے پولیس کو آئندہ سماعت سے قبل اضافی رپورٹس ملزمان کے وکلا کو فراہم کرنے کی ہدایت کرتے ہوئے جی ایچ کیو حملہ کیس کی سماعت 6 فروری تک ملتوی کردی ہے۔
انسداد دہشت گردی عدالت نے بشری بی بیٰ کی 26 نومبر کے 31 مقدمات میں عبوری ضمانت میں بھی 8 فروری تک توسیع کر دی۔ عدالت نے متعلقہ تفتیشی افسران کو ہدایت کی کہ وہ 8 فروری سے قبل بشری بی بی کو 31 مقدمات میں شامل تفتیش کریں۔
عدالت نے 8 فروری کی سماعت میں بشریٰ بی بی کو بھی عدالت کے سامنے پیش کرنے کا حکم دیتے ہوئے بشریٰ بی بی کی ضمانت کی درخواستوں پر سماعت 8 فروری تک ملتوی کر دی ہے۔
جی ایچ کیو حملہ کیس : عمر ایوب اور راجہ بشارت کو رہا کرنے کا حکم
