بدنام زمانہ گجرات فسادات کیخلاف آخری دم تک لڑنے والی ذکیہ جعفری انتقال کرگئیں، انھوں نے اس سازش کی تحقیقات کے لیے قانونی جدوجہد کی۔
ذکیہ جعفری آج احمد آباد میں انتقال کر گئیں، وہ کانگریس کے سابق ایم پی احسان جعفری کی بیوہ تھیں، ان کے شوہر 2002 کے بدنام زمانہ گجرات فسادات کے دوران گلبرگ سوسائٹی میں 68 دیگر افراد کے ساتھ قتل کر دیے گئے تھے۔
2002 کے گجرات فسادات میں مبینہ طور پر بڑی سازش کی تحقیقات کے لیے انھوں قانونی طور پر جدوجہد کی، ذکیہ جعفری نے اعلیٰ عہدیداروں کے خلاف تحقیقات کا مطالبہ کیا تھا۔
مذکورہ کیس میں مجسٹریٹ عدالت نے خصوصی تفتیشی ٹیم کی جانب سے دی گئی کلین چٹ کےبعد ان کی درخواست مسترد کر دی جس کے بعد نے گجرات ہائی کورٹ سے رجوع کیا تھا۔
ہائی کورٹ نے بھی 2017 میں ایس آئی ٹی کی رپورٹ کو قبول کیا، جس کے بعد وہ سپریم کورٹ گئیں، جون 2022 میں، سپریم کورٹ نے بھی ذکیہ کی درخواست کو مسترد کر دیا اور ریاستی حکام کو دی گئی کلین چٹ کو برقرار رکھا تھا۔
ذکیہ جعفری کے انتقال پر تیستا سیتلواڑ نے سوشل میڈیا پلیٹ فارم ’ایکس‘ پر لکھا کہ ’ذکیہ آپا جو انسانی حقوق کے لیے ایک ہمدرد رہنما تھیں ابھی 30 منٹ پہلے دنیا سے رخصت ہو گئیں!‘
’ان کی بصیرت انگیز موجودگی کو قوم، خاندان، دوستوں اور دنیا بھر کے لوگوں کی طرف سے یاد رکھا جائے گا! ہم ذکہ آپا کی فیملی کے ساتھ کھڑے ہیں‘۔
