کراچی : شہر قائد کی سڑکوں پر آئے روز ٹریفک پولیس اور شہریوں کے درمیان تلخ کلامی اور جھگڑوں کے مناظر دیکھنے میں آتے ہیں۔
اس کی سب سے بڑی وجہ تو شہریوں کی جانب سے ٹریفک قوانین کی خلاف ورزی اور اوپر سے چوری اور سینہ زوری کے مصداق اہلکاروں سے بحث اور اپنے اثر رسوخ کا دباؤ ڈالنا ہوتا ہے۔
اگر دوسری جانب جائزہ لیا جائے تو بعض ٹریفک اہلکار بھی اپنی ڈیوٹی اور فرائض کو بالائے طاق رکھتے ہوئے چند روپے کی رشوت کے عوض ایسے شہریوں کو مزید ڈھیل دیتے ہیں جس کے نتیجے میں ٹریفک حادثات رونما ہوتے ہیں۔
اس حوالے سے اے آر وائی نیوز کے پروگرام سر عام کی ٹیم نے کراچی کی مختلف شاہراہوں پر شہریوں کی جانب سے ٹریفک اہلکاروں کے ساتھ روا رکھے جانے والے برتاؤ اور رویوں کا جائزہ لیا۔
پروگرام سر عام کے میزبان اقرار الحسن کے مطابق لاہور میں اور کراچی میں کیے جانے والے پروگراموں کے بعد اس بات کا اندازہ ہوا کہ لاہور کی نسبت کراچی کے ٹریفک اہلکار زیادہ شہریوں کے برے سلوک کا سامنا کرتے ہیں۔
سیاسی رہنما وڈیروں کی اولادیں اثر و رسوخ رکھنے والے صحافی، وکیل اور پولیس افسران کے بھانجے بھتیجے اکثر ان اہلکاروں کو تضحیک کا نشانہ بناکر ان کی سڑک پر ہی تذلیل کرتے ہیں۔
اس موقع پر کراچی کی دو اہم شاہراہوں پر ٹریفک اہلکاروں کے ساتھ مل کر خفیہ ریکارڈنگ کی تاکہ شہریوں کے اس رویے کی نشاندہی کرکے اس کا سدباب کرنے کی کوشش کی جائے۔
’میں ایم پی کا بھائی ہوں‘
ٹریفک اہلکاروں نے ایک رنگین شیشوں والی قیمتی گاڑی کو روکا تو اس میں موجود شخص نے خود کو ایم پی اے کا بھائی بتایا اور عب جمانے کی کوشش کی تاہم پولیس افسر کی جانب سے یہی ترغیب دی جاتی رہے کہ چالان کروالیں ترو زیادہ بہتر ہے تاہم کچھ دیر کی بحث و تکرار کے بعد وہ شخص چالان کٹوانے پر راضی ہوگیا۔
’یہ گاڑی ایس ایچ او کی ہے‘ شہری کا جھوٹ رنگے ہاتھوں پکڑا گیا،
اسی دوران ایک اور بڑی گاڑی کو اسی قانون کی خلاف ورزی کرتے ہوئے روکا گیا تو اس میں موجود شخص نے یہ بتا کر رعب جمانے کی کوشش کی کہ یہ گاڑی ایس ایچ او کی ہے، تاہم جب اس کو احساس ہوا کہ ٹیم سرعام بھی یہاں موجود ہے تو اس نے بغیر کسی پس و پیش کے اپنے جھوٹ کا اقرار کرتے ہوئے بتایا کہ یہ میری ذاتی گاڑی ہے تاہم میں چالان بھی کٹوا رہا ہوں اور یہ شیشے بھی صاف کردوں گا۔،
سیاسی جماعت کے جھنڈے والی گاڑی کے مالک کی پولیس کو مغلظات
اس دوران ایک نہایت افسوسناک واقعہ بھی پیش آیا جب ایک ایسی گاڑی کو روکا گیا جس کے باہر پیپلز پارٹی کا جھنڈا لگا ہوا تھا، اس میں موجود صاحب نے روکے جانے کو اپنی بے عزتی گردانتے ہوئے انتہائی برہمی کا مظاہرہ کیا اور بجائے کاغذات دکھانے کے اہلکاروں کو مغلظات بکنا شروع کردیں، صرف اتنا نہیں نہایت غصے کے عالم میں سامنے کھڑے اہلکاروں کی جان کی پرواہ کیے بغیر تیزی گاڑی بھگا کر فرار ہوگیا۔
