بھارت میں جاری رانجی ٹرافی میں ناکامی پر معروف بھارتی بلے باز نے تمام طرز کی کرکٹ سے ریٹائرمنٹ کا اعلان کر دیا ہے۔
بھارت میں رانجی ٹرافی جاری ہے۔ بی سی سی آئی کی ہدایت پر بھارتی کرکٹ ٹیم کے موجودہ سپر اسٹارز اپنی فارم کی بحالی کے لیے یہ ڈومیسٹک کرکٹ کھیل رہے ہیں۔ لیکن ایک بلے باز نے بیٹنگ میں ناکامی کے بعد تمام طرز کی کرکٹ سے ریٹائرمنٹ کا اعلان کر دیا ہے۔
یہ بھارتی کرکٹر وکٹ کیپر بیٹر وریدھمن ساہا ہیں، جو رانجی ٹرافی کے آخری میچ میں ناکام رہے اور بغیر کوئی رن بنائے آؤٹ ہوئے۔ تاہم ان کی ٹیم بنگال نے اس میچ میں پنجاب کو اننگ اور 13 رنز سے ہرا دیا۔
وریدھمن نے آخری میچ کے بعد سماجی رابطوں کی ویب سائٹ ایکس پر جذباتی پوسٹ کرتے ہوئے اپنی ریٹائرمنٹ کا اعلان کیا۔
سماجی رابطے کے پلیٹ فارم ایکس پر وریدھمن ساہا نے ایک جذباتی پوسٹ میں لکھا کہ اس بات کو 28 برس ہوگئے جب انہوں نے پہلی بار 1997 میں کرکٹ کی فیلڈ میں قدم رکھا اور یہ سفر کیا خوب رہا۔ اپنے ملک، ریاست، ضلع، کلبز، یونیورسٹی، کالج اور اسکول کی نمائندگی کرنا زندگی کا سب سے بڑا اعزاز ہے۔
اس آخری میچ کے بعد ساتھی کھلاڑیوں نے وریدھمن ساہا کو اپنے کندھوں پر اٹھا لیا اور انہیں پرتپاک انداز میں کرکٹ کے میدان سے رخصت کیا۔
واضح رہے کہ 40 سالہ ساہا نے اپنے کیریئر کا آغاز فروری 2010 میں کیا اور 40 ٹیسٹ اور نو ایک روزہ میچز میں بھارت کی نمائندگی کی۔ انہوں نے ڈومیسٹک میں بنگال اور تریپورا کی نمائندگی کرتے ہوئے 142 فرسٹ کلاس اور 116 لسٹ اے میچز میں حصہ لیا۔
