کراچی: پاکستان پیپلز پارٹی نے دریائے سندھ سے کینال نکالنے پر وزیر اعظم شہباز شریف کے خلاف تحریک عدم اعتماد پیش کرنے کی دھمکی دے دی۔
ترجمان سندھ حکومت نادر گبول نے اے آر وائی نیوز سے گفتگو کرتے ہوئے کہا کہ پارٹی چیئرمین بلاول بھٹو زرداری نے وفاقی حکومت کو واضح کر دیا ہے کہ اگر دریائے سندھ سے کینال نکالے گئے تو وفاقی حکومت سے الگ ہو جائیں گے۔
نادر گبول نے کہا کہ وزیر اعظم شہباز شریف کے خلاف عدم اعتماد کی تحریک پیش کی جائے گی پھر یہ حکومت نہیں رہے گی پی ٹی آئی حکومت کو بھی ہم نے گرایا تھا۔
انہوں نے کہا کہ سندھ کا کوئی شخص دریائے سندھ سے کینال نکالنے کو قبول نہیں کرے گا، سندھ کے پانی پر ڈاکا ڈالنے کی اجازت نہیں دی جائے گی۔
گفتگو میں ترجمان سندھ حکومت نے کہا کہ پیپلز بس سروس کے کرایوں میں اضافہ ناگزیر تھا تاہم اس میں صحافیوں اور طلبہ کیلیے مفت سفر کا فیصلہ کیا جائے گا۔
ان کا کہنا تھا کہ ایم کیو ایم کی سیاست ختم ہوگئی ہے بوری بند لاشیں اور قتل و غارت ایم کیو ایم کا پیشہ رہا ہے، ایم کیو ایم والے خود کو میڈیا میں زندہ کرنے کیلیے ہم پر تنقید کر رہے۔
24 جنوری 2025 کو پاکستان پیپلز پارٹی کی سینٹرل ایگزیکٹیو کمیٹی (سی ای سی) کے اجلاس کا اندرونی احوال سامنے آگیا تھا جس میں ارکان نے سخت مؤقف اختیار کیا تھا۔
ذرائع نے اے آر وائی نیوز کو بتایا تھا کہ سی ای سی اجلاس میں میں بیشتر ارکان نے حکومتی رویے کو افسوسناک قرار دیتے ہوئے کہا تھا کہ (ن) لیگ کی حکومت اور وزیر اعظم شہباز شریف ہمارے ووٹوں پر کھڑے ہیں، حکومتی کمیٹیوں سے مذاکرات بے نتیجہ رہے ہیں پیپلز پارٹی نے (ن) لیگ کو وعدے پورے کرنے کیلیے وقت دیا۔
اجلاس میں کہا گیا تھا کہ وعدوں کو پورا کرنے کیلیے حکومت کی سنجیدگی دکھائی نہیں دے رہی، حکومت بغیر مشاورت ہر فیصلہ اور بل منظور کر رہی ہے، طے کرنا چاہیے آئندہ حکومت کی کسی بل میں حمایت نہ کی جائے، حکومت سے الگ نہیں تو وعدے پورے کرنے تک حمایت نہ کی جائے۔
