اسلام آباد : سال 2025 کی پہلی قومی انسداد پولیو مہم کا باقاعدہ آغاز کردیا گیا ، مہم میں 4 کروڑ سے زائد بچوں کو قطرے پلائے جائیں گے۔
تفصیلات کے مطابق سال 2025 کی پہلی قومی انسداد پولیو مہم کا باقاعدہ آغاز ہوگیا، ترجمان وزارتِ صحت نے بتایا کہ پولیو مہم کے دوران ملک بھر میں 4 کروڑ 50 لاکھ سے زائد بچوں کو پولیو کے قطرے پلائے جائیں گے۔
قومی پولیو مہم میں 4 لاکھ سے زائد تربیت یافتہ پولیو ورکرز گھر گھر جاکر اپنی خدمات سرانجام دیں گے۔
وزیراعظم کے کوآرڈینیٹر برائے صحت ڈاکٹر مختار بھرتھ نے والدین سے اپیل کی کہ پولیو ورکرز کا بھرپور ساتھ دیں اور اپنے بچوں کو پولیو کے قطرے لازمی پلوائیں۔
ڈاکٹر مختار بھرتھ کا کہنا تھا کہ پانچ سال سے کم عمر تمام بچوں کو پولیو ویکسین پلوانا والدین کی قومی و اخلاقی ذمہ داری ہے، پاکستان سے پولیو کا مکمل خاتمہ حکومت کی اولین قومی ترجیح ہے۔
انھوں نے کہا کہ وزیراعظم پاکستان کی ذاتی دلچسپی پولیو کے خاتمے کے لیے حکومتی عزم کی عکاس ہے، وزیراعظم کی قیادت میں پولیو کے خلاف یہ جنگ پوری قوت اور مستقل مزاجی سے جاری ہے۔
پولیو پروگرام اور توسیعی پروگرام برائے حفاظتی ٹیکہ جات کے مابین ہم آہنگی کو مزید مضبوط کیا جارہا ہے، ملک بھر میں معمول کے حفاظتی ٹیکہ جات کی کوریج کو بہتر بنانے کے لیے مؤثر اور مربوط اقدامات کیے جا رہے ہیں، ہمارا بنیادی مقصد بچوں کو پولیو سمیت دیگر مہلک بیماریوں سے بچانا ہے۔
دوسری جانب سندھ میں 10.6 ملین سے زائد بچوں کو پولیوقطرے پلانے کی مہم کا آغاز ہوگیا ، انسداد پولیو مہم 9 فروری تک جاری رہے گی۔
5 سال سے کم عمر 10.6ملین سے زائد بچوں کو قطرے پلائے جائیں گے، مہم میں 81 ہزار سے زائد ورکرزحصہ لے رہے ہیں۔
