راولپنڈی : بانی پی ٹی آئی عمران خان نے بطور سابق وزیراعظم آرمی چیف جنرل عاصم منیر کو خط لکھ دیا ، جس میں فوج اورعوام میں فاصلے کی وجوہات بیان کی ہیں۔
تفصیلات کے مطابق پاکستان تحریک انصاف چیئرمین بیرسٹر گوہر نے میڈیا سے گفتگو کرتے ہوئے کہا بانی پی ٹی آئی عمران خان نے آرمی چیف جنرل عاصم منیر کو بطور سابق وزیر اعظم خط لکھا ہے، بانی نے خط میں فوج اورعوام میں فاصلے کی وجوہات بیان کی ہیں۔
خط میں کہا گیا ہے کہ افواج پاکستان بہت قربانیاں دے رہی ہے، فوج اور ملک ہمارا ہے، ہم انتشار نہیں چاہتے، ضروری ہے کہ عوام فوج کیساتھ کھڑی ہو۔
دوسری جانب پاکستان تحریک انصاف کے رہنما فیصل چوہدری نے میڈیا سے گفتگو کرتے ہوئے کہا کہ عمران خان نے آرمی چیف کو خط بھجوایا ہے، بانی پی ٹی آئی نے بطور سابق وزیراعظم آرمی چیف کوخط لکھا ہے۔
فیصل چوہدری کا کہنا تھا کہ خط میں کہا گیا ہے ہمارے فوجی ہرروز قربانیاں دے رہےہیں، موجودہ حالات میں ضروری ہے پوری قوم فوج کےساتھ کھڑی ہو۔
انھوں نے بتایا کہ خط میں 6نکات بیان کئے ہیں، خط میں پہلا نکتہ فراڈالیکشن اور26ویں ترمیم سےمتعلق ہے جبکہ القادرٹرسٹ کیس کے فیصلے کا حوالہ بھی دیا گیا ہے اور پیکاقانون میں ترمیم اور معیشت سے متعلق نکات شامل ہیں۔
رہنما پی ٹی آئی کا کہنا تھا کہ جوڈیشل کمیشن بناکرتحقیقات کی جائیں کس کاکیاقصورہے، 26نومبر کا احتجاج آئین کے دائرے میں کیا گیا تھا۔
