برطانیہ میں بسنے والے تارکین وطن بالخصوص مسلمان اور پاکستانیوں کے لیے حالات کافی مشکل ہو چکے ہیں، نسلی تعصب اور نفرت میں آئے روز اضافہ دیکھا جا رہا ہے۔
پچھلی کئی دہائیوں سے برطانیہ میں نسل پرست جماعتوں کی جانب سے مسلمان مخالف مہم چلائی جا رہی ہے، تاہم جب امریکی ارب پتی اور ایکس کے مالک ایلون مسک کی جانب سے کچھ ٹویٹس آئیں تو اس مہم میں نئے سرے سے جان پڑ گئی۔
ایلون مسک کی جانب سے برٹش پاکستانیوں کے خلاف سفید فام باشندوں کے جزبات کو خاص طور پر بھڑکایا گیا، جس کے بعد ایک نہ شروع ہونے والی نفرت کا سلسلہ چل پڑا ہے۔
2010 میں شمالی برطانیہ کے ٹاؤن رادھرم میں کم عمر بچیوں (12-16سال کی عمر) کے ساتھ زیادتی کے کیس میں 5 برٹش پاکستانیوں کو سزا سنائی گئی، جس کے بعد 2012 میں برطانوی جریدے دی ٹائمز نے اپنی رپورٹ میں انکشاف کیا کہ ان جرائم کا مقامی اداروں کو علم تھا، جس کو چھپایا گیا، تاہم اس کے بعد تحقیقات کا دائرہ کار بڑھا گیا۔
پولیس کی جانب سے اس حوالے سے 2012 میں بڑے پیمانے پر تحقیقات شروع کی گئیں، جن میں یہ 1970 سے لے کر 2013 تک 1400 سے زائد کم عمر بچیوں کا جنسی استحصال کرنے کے شواہد ملے، جس میں مزید 19 مردوں اور 2 خواتین کو سزائیں سنائیں گئیں۔
ایلون مسک نے ”یو ایس ایڈ“ کو مجرم تنظیم قرار دے دیا
سزا یافتہ مجرمان میں سے متعدد نے اپنی سزائیں پوری کر لی ہیں، اور وہ اب جیلوں سے باری باری باہر آ رہے ہیں، جس پر نسل پرست جماعتوں کے رہنماؤں نے شور شرابا کیا، کہ ان کو رہا کیوں کیا جا رہا ہے۔ اس کو ایلون مسک نے ری ٹویٹ کرتے ہوئے برطانوی وزیر اعظم کو بھی سخت تنقید کا نشانہ بنایا۔
ایلون مسک کے اقدام سے پاکستانی کمیونٹی برطانیہ میں اس وقت شدید تنقید اور نفرت آمیز رویے کی زد پر ہے، اور یہ صورت حال آئے روز مزید خراب ہو رہی ہے۔ سفید فام باشندوں کی ایک بڑی تعداد اُن کو نفرت اور حقارت سے دیکھ رہی ہے، نسلی پرستی کے خلاف کام کرنے والے افراد کا کہنا ہے کہ مسلمانوں اور پاکستانیوں کے خلاف جتنی نفرت ایلون مسک کے چند ٹویٹس نے پھیلا دی ہے، اُتنی گزشتہ 60 سالوں میں انتہائی دائیں بازو کی جماعتیں مل کر بھی نہیں پھیلا سکیں۔
