بانی پی ٹی آئی نے گزشتہ دنوں آرمی چیف جنرل عاصم منیر کو خط تحریر کیا اس کی کیا وجہ تھی پارٹی کے ایک رہنما نے بتا دیا ہے۔
پاکستان تحریک انصاف کے رہنما اور سینیٹ میں اپوزیشن لیڈر سینیٹر شبلی فراز نے اسلام آباد جوڈیشل کمپلیکس میں گفتگو کرتے ہوئے کہا کہ بانی پی ٹی آئی عمران خان نے آرمی چیف جنرل عاصم منیر کو خط اس لیے لکھا کہ ہے وہ قومی لیڈر کے طور ملک کی صورتحال سے پریشان ہیں اور انہوں نے اپنے خط میں پاکستان کی موجودہ صورتحال کا پورا جائزہ پیش کیا ہے۔
شبلی فراز نے کہا کہ 2 سال سے مسلسل سیاسی عدم استحکام کے باعث ملک پیچھے ہی جا رہا ہے۔ اس وقت ملک کو کوئی سسٹم آگے لے کر جا سکتا ہے تو وہ جمہوریت ہے۔ معاملات اس نہج پر پہنچ جائیں تو پھر خاموش رہنا ٹھیک نہیں ہوتا۔
ان کا کہنا تھا کہ احتجاج ہمارا جمہوری حق ہے۔ احتجاج کے موقع پر لیڈروں اور کارکنان کو گرفتار کیا جاتا ہے اور ایسی گرفتاریوں سے سیاسی عدم استحکام بڑھتا ہے۔
پی ٹی آئی رہنما نے مزید کہا کہ آج ایسے کیس میں آئے ہینِ جس میں موجود ہی نہیں تھے۔ ایسے کیسز صرف وکلا اور رہنماؤں کو مصروف رکھنے کیلیے بنائے گئے ہیں۔
