بیوی کی فرمائش پوری نہ کرنے گھروں میں جھگڑے عام سی بات ہے لیکن ہائی ہیل سینڈل نہ دلانے پر ایک خاتون شوہر کے خلاف تھانے پہنچ گئی۔
میاں بیوی کے درمیان ان بن ہونا غیر معمولی بات نہیں۔ خاص طور پر جب شوہر بیوی کی کوئی فرمائش پوری نہ کر سکے تو بعض اوقات لڑائی جھگڑے ہو جاتے ہیں، لیکن بعض اوقات ایک گاڑی کے دو پہیے کہلائے جانے والے جوڑوں میں ایسی باتوں پر جھگڑے طول پکڑ جاتے ہیں جن کو سن کر ہنسی چھوٹ پڑی ہے جیسا کہ اس واقعے میں ہوا۔
یہ مضحکہ خیز واقعہ بھارتی شہر آگرہ میں پیش آیا جہاں ایک خاتون نے اپنے شوہر سے اونچی ہیل کی سینڈل دلانے کی فرمائش کی۔ تاہم شوہر نے جب اس کو سینڈل لا کر نہ دیا تو وہ غصے میں ایسا آپے سے باہر ہوئی کہ میاں کے خلاف رپورٹ درج کرانے تھانے جا پہنچی۔
بھارتی میڈیا کے مطابق جب خاتون کی ہائی ہیل سینڈل کی فرمائش پوری نہ ہوئی تو اس نے شوہر سے جھگڑا شروع کر دیا۔ جھگڑا بڑھا تو یہ معاملہ فیملی کونسلنگ کے پاس گیا اور وہاں بھی حل نہ ہوا تو پھر خاتون پولیس تھانے پہنچ گئی۔
خاتون نے جب تھانے پہنچ کر اپنے میاں کے خلاف شکایت درج کرانے کی وجہ بتائی تو پولیس اہلکاروں کی بھی ہنسی چھوٹ گئی۔ تاہم پولیس نے معاملہ سلجھانے کے لیے مذکورہ خاتون کے شوہر کو طلب کر لیا۔
شوہر نے پولیس کو بتایا کہ کچھ عرصہ قبل بھی اس کی بیوی نے اونچی ہیل کی سینڈل کی فرمائش کی تھی اور میں نے اس کی یہ فرمائش پوری بھی کی تھی، تاہم وہ تفریح کے لیے جاتے ہوئے اس ہائی ہیل کے باعث گر کر زخمی ہوئی تھی۔ اسی وجہ سے میں نے اس کو دوبارہ ہائی ہیل سینڈل نہیں دلائی۔
مظلوم شوہر نے بتایا کہ دوسری بار فرمائش پوری نہ کرنے پر پہلے بیوی نے اس کے ساتھ جھگڑا کیا۔ فیملی کونسلنگ معاملے لے کر گئی اور پھر روٹھ کر میکے جا پہنچی اور اب تھانے میرے خلاف شکایت لے کر آگئی۔
بعد ازاں پولیس نے دونوں کو سمجھا بجھا کا ان کے درمیان صلح کرائی جس کے بعد میاں بیوی راضی خوشی اپنے گھر واپس چلے گئے۔
