کراچی: اعلیٰ ثانوی تعلیمی بورڈ کراچی نے چیئرمین ڈاکٹر سید شرف علی شاہ کی ہدایت پر انٹرمیڈیٹ سال اول کامرس ریگولر، آرٹس ریگولر اور خصوصی امیدواروں کے سالانہ امتحانات برائے 2024ء کے نتائج کا اعلان کر دیا۔
ناظم امتحانات زرینہ راشد نے امتحانی نتائج کی تفصیلات بتاتے ہوئے کہا کہ کامرس ریگولر گروپ کے امتحانات میں 28 ہزار 251 امیدواروں نے رجسٹریشن حاصل کی، 27 ہزار 457 امیدوار شریک ہوئے جس میں 8 ہزار 494 امیدوار تمام سات پرچوں میں، 4 ہزار 608 امیدوار چھ پرچوں میں، 3 ہزار 384 امیدوار پانچ پرچوں میں، 2 ہزار 631 چار پرچوں میں، 2 ہزار 353 تین پرچوں میں، 2 ہزار 141 دو پرچوں میں جبکہ 2 ہزار 90 امیدوار ایک پرچے میں کامیاب قرار پائے۔
انہوں نے بتایا کہ آرٹس ریگولر گروپ کے امتحانات میں 10 ہزار 500 امیدواروں نے رجسٹریشن حاصل کی جبکہ 9 ہزار 792 امیدواروں نے امتحانات میں شرکت کی، امتحانات میں 2 ہزار 818 امیدوار تمام چھ پرچوں میں، 2 ہزار 5 امیدوار پانچ پرچوں میں، 1 ہزار 532 چار پرچوں میں، 1 ہزار 312 تین پرچوں میں، 915 دو پرچوں میں جبکہ 714 امیدوار ایک پرچے میں کامیاب ہوئے۔
خصوصی امیدواروں کے امتحانات میں 109 امیدواروں نے رجسٹریشن حاصل کر کے امتحانات میں شرکت کی، امتحانات میں 85 امیدوار تمام چھ پرچوں میں، 13 پانچ پرچوں میں، 7 چار پرچوں میں اور 4 امیدوار تین پرچوں میں کامیاب قرار پائے۔
