اسلام آباد: وزیر اعطم شہباز شریف نے خوشخبری سنائی ہے کہ بجلی کے شعبے میں اصلاحات سے گھریلو صارفین اور صنعتوں کیلیے ٹیرف میں مزید کمی ہوگی۔
وزیر اعظم شہباز شریف کی زیرِ صدارت بجلی شعبے کی اصلاحات پر عملدرآمد کا جائزہ اجلاس ہوا جس میں انہوں نے کہا کہ بجلی شعبے میں جاری اصلاحات کے مثبت ثمرات مل رہے ہیں، بگاڑ بہتر کرنے کیلیے وزارت اور متعلقہ اداروں کا تعاون خوش آئند ہے۔
شہباز شریف نے کہا کہ پہلے روز وعدہ کیا تھا کم لاگت پر ماحول دوست بجلی کی فراہمی یقینی بنائیں گے، آئی پی پیز معاہدوں پر نظر ثانی سے خزانے کو بچت اور بجلی سستی ہو رہی ہے، انسداد بجلی چوری مہم سے تقسیم کار کمپنیوں کے خسارے میں کمی خوش آئند ہے۔
یہ بھی پڑھیں: بجلی سستی ہونے والی ہے! پاکستانیوں کیلیے بڑی خوشخبری
انہوں نے کہا کہ تمام تقسیم کار کمپنیوں کے خسارے میں 100 فیصد کمی لائیں گے، اصلاحات سے گھریلو صارفین اور صنعتوں کیلیے ٹیرف میں مزید کمی ہوگی، تقسیم کار کمپنیوں میں نجی شعبے سے اچھی شہرت کے بورڈ ارکان کی تعیناتی سے کارکردگی بہتر ہو رہی ہے۔
وزیر اعظم نے متعلقہ حکام کو ہدایت کی کہ تقسیم کار کمپنیوں میں جلد نجی شعبے سے بورڈ ارکان تعینات کر دیے جائیں، ترسیلی نقصانات میں کمی بھی اصلاحات کے مثبت نتائج کا منہ بولتا ثبوت ہے۔
اجلاس میں بجلی شعبے کی اصلاحات کے آئندہ 3 برس کے اہداف اور کارکردگی پر بریفنگ دی گئی۔ بتایا گیا کہ دسمبر 2024 تک تقسیم کار کمپنیوں کی وصولیاں بہتر ہو کر 93.26 پر پہنچ گئیں۔
گردشی قرضے میں مرحلہ وار کمی کے لائحہ عمل اور ٹیرف میں کمی، مٹیاری، مورو، رحیم یار خان اور غازی بروتھہ، فیصل آباد ٹرانسمیشن لائینز منصوبوں پر بریفنگ دی گئی۔
شہباز شریف نے تمام اصلاحات و منصوبوں کو معینہ مدت میں مکمل کرنے کی ہدایت کی۔
