کراچی : سندھ انسٹیٹیوٹ آف یورولوجی اینڈ ٹرانسپلانٹیشن سینٹر میں روبوٹک سرجری کی تعداد دو ہزار سے تجاوز کرگئی۔
تفصیلات کے مطابق سندھ انسٹیٹیوٹ آف یورولوجی اینڈ ٹرانسپلانٹیشن سینٹر (ایس آئی یو ٹی) میں گردوں اور پروسٹیٹ کینسر سمیت مختلف پیچیدہ امراض میں مبتلا دو ہزار سے زائد مریضوں کی کامیاب روبوٹک سرجری کردی گئی۔
روبوٹک سرجری تھری ڈی امیجنگ ٹیکنالوجی کے ذریعے انجام دی جا رہی ہے، جو ڈاکٹروں کو مریض کے جسم کے اندرونی حصے کو انتہائی باریک بینی سے دیکھنے کی سہولت دیتی ہے۔
طبی ماہرین کا کہنا ہے کہ اس کے ذریعے روبوٹک آرمز زیادہ درستگی کے ساتھ کام کرتے ہیں، جس سے پیچیدگیوں کے امکانات کم اور مریض تیزی سے صحتیاب ہو سکتے ہیں۔
ایس آئی یو ٹی کے پروفیسر آف یورولوجی ریحان محسن کا کہنا تھا کہ مستقبل کے ڈاکٹرز کی تربیت کے لیے روٹک سرجریز پر مبنی سیمینارز بھی کروائے جارہے ہیں ۔
طبی ماہرین کے مطابق یہ ٹیکنالوجی یورولوجی کے پیچیدہ کیسز میں نہ صرف بہتر نتاتج کی حامل ہے بلکہ مریضوں کے لیے کم درد اور جلد صحتیابی کا ذریعہ بھی بن رہی ہے، اس سرجری میں مریضوں کی کامیابی کی شرح مثبت ہے۔
