کراچی: بڑھتے ہوئے ٹریفک حادثات کے پیش نظر سندھ حکومت نے دن کے اوقات میں کراچی میں ڈمپر کے داخلے پر پابندی لگانے کا فیصلہ کر لیا۔ ڈمپرز کو رات 11 سے صبح 6 بجے تک داخلے کی اجازت ہوگی۔
وزیر اعلیٰ سندھ مراد علی شاہ کی ہدایت پر چیف سیکرٹری کا ٹریفک حادثات پر ہنگامی اجلاس ہوا جس میں آئی جی سندھ، کمشنر کراچی، اے آئی جی کراچی، ڈی آئی جی ٹریفک و دیگر نے شرکت کی۔ سندھ سالڈ ویسٹ مینجمنٹ بورڈ کو 3 ماہ میں آپریشن رات کے ٹائم شفٹ کرنے کی ہدایت کی گئی۔
اجلاس میں کراچی میں چلنے والی بڑی گاڑیوں اور ڈرائیورز کے فزیکل ویری فکیشن اور گاڑیوں کو محکمہ ٹرانسپورٹ سے کیو آر کوڈ لگا سرٹیفکیٹ لازمی قرار دینے کا فیصلہ کیا گیا۔
یہ بھی پڑھیں: میں اب سڑکوں پر نکل کر ڈمپر روکوں گا، انہیں پکڑوائیں گے، گورنر سندھ
چیف سیکرٹری سندھ نے واٹر بورڈ کے تمام واٹر ٹینکرز کی ایک ماہ میں انسپکشن اور موٹر سائیکل سواروں کو ہیلمٹ پہننے اور ٹریفک پولیس عملدرآمد کروانے کی ہدایت کی۔
انہوں نے کہا کہ محکمہ اطلاعات ٹریفک قوانین اور آگاہی کیلیے میڈیا پر مہم چلائے، لاپرواہی سے ڈرائیونگ کرنے والوں کے خلاف چالان اور مقدمہ درج کریں۔
اجلاس میں سندھ حکومت نے صوبے میں وہیکل انسپکشن اینڈ سرٹیفکیشن سسٹم شروع کرنے کا فیصلہ کیا اور محکمہ ٹرانسپورٹ کو وہیکل انسپکشن اینڈ سرٹیفکیشن سسٹم شروع کرنے کی ہدایت کی گئی۔
ٹریفک پولیس حکام نے بتایا کہ کراچی میں چلنے والی گاڑیوں میں 65 فیصد موٹر سائیکل ہیں، 55 فیصد حادثات موٹر سائیکل سواروں کے ہوتے ہیں۔
اس پر چیف سیکریٹری سندھ نے ڈی آئی جی ٹریفک کو ایک ماہ میں ٹریفک حالات بہتر کرنے اور ٹریفک چالان کو 4 گنا بڑھانے کی ہدایت کی۔
