وزیر دفاع خواجہ آصف کا کہنا ہے کہ یہ ہمارا اجتماعی فرض ہے کہ سمندری تجارت کے تحفظ کیلئے مشترکہ کوششیں کریں۔

وزیر دفاع خواجہ آصف نے امن ڈائیلاگ کی افتتاحی تقریب سے خطاب میں کہا کہ  دنیا بڑی معاشی تبدیلیوں سے گزر رہی ہے، تجارتی ٹیرف ایک بڑا چیلنج بن کر سامنے آئے ہیں۔

وزیردفاع خواجہ آصف کا کہنا تھا کہ یہ ہمارا اجتماعی فرض ہے کہ سمندری تجارت کے تحفظ کیلئے مشترکہ کوششیں کریں، عالمی معاشی نظام میری ٹائم پر انحصار کرتا ہے، بحر ہند عالمی تیل اور گیس کے 50 فیصد ذخائر رکھتا ہے۔

انہوں نے کہا کہ بحری تجارت کا معیشت میں بنیادی کردار ہے، طاقتور بحریہ سمندری تجارت کے تحفظ کی ضامن ہے، بحری شعبے میں درپیش غیر روایتی چیلنجز سے نمٹنے کیلئے اجتماعی اقدامات ناگزیر ہیں۔

خواجہ آصف نے مزید کہا کہ مصنوعی ذہانت اور ٹیکنالوجی کے انقلاب نے عالمی منظرنامہ بدل دیا، پاک بحریہ علاقائی امن اور سلامتی کیلئے اہم کردار ادا کررہی ہے۔