انڈوں کے چھلکے اور کینو میں شامل ان گنت مفید اجزا چہرے کی جلد کو ایک نیا روپ اور شادابی دے سکتے ہیں، اگر فروٹ کھانا صحت کے لیے بہتر ہے تو اس کا براہِ راست استعمال بھی انتہائی اہم ہے۔
ماہرین صحت کا کہنا ہے کہ اگر آپ روز ایک کینو کھائیں تو آپ متعدد بیماریوں سے بچے رہتے ہیں جبکہ انڈے کا چھلکا کیلشیم کاربونیٹ پر مشتمل ہوتا ہے اس میں پروٹین اور دیگر مرکبات بھی پائے جاتے ہیں۔
گھریلو ٹوٹکے وقت کے ساتھ درست ثابت ہوتے رہے ہیں اور زیادہ تر خواتین آج بھی پرکشش نظر آنے کیلئے ان ٹوٹکو پر بھروسہ کرتی ہیں۔ آج ہم آپ کیلئے ایک ایسا ہی آسان سا نسخہ لے کر آئے ہیں جو آپ کی خوبصورتی کو مزید نکھارنے میں مددگار ثابت ہوسکتا ہے۔
اے آر وائی ڈیجیٹل کے پروگرام گڈ مارننگ پاکستان میں ماہر بیوٹیشن نے ایک بہترین اور انتہائی کم خرچ نسخہ بیان کیا جس کے استعمال سے آپ کی جلد نرم و ملائم اور چمکدار ہوجائے گی۔
انہوں نے بتایا کہ اسے بنانے کیلیے صرف دو چیزیں درکار ہیں، پہلی چیز کینو کے چھلکوں کا پاؤڈر اور دوسری انڈوں کے چھلکے کا پاؤڈر ان دونوں کو ایک ایک چمچ لے کر پانی کے ساتھ پیسٹ بنالیں۔
انہوں نے بتایا کہ وٹامن سی سے بھرپور کینو کے چھلکے میں کئی فوائد پوشیدہ ہیں اور انڈے کا چھلکا کیلشیم کاربونیٹ پر مشتمل ہوتا ہے۔
سارا دن میک اپ کی وجہ سے جو پگمینٹیشن ہوتی ہے خشکی یا دیگر خرابیاں پیدا ہوتی ہیں یہ پیسٹ اس کا خاتمہ کردے گا۔
کینو کے چھلکوں کو دھوپ میں سکھا کر اس کو پیس لیں جس کے بعد یہ پاؤڈر کی صورت اختیار کرجائے گا اور اسی طرح انڈوں کے چھلکے سکھا کر اچھی طرح پیس لیں کہ کوئی گنجائش نہ رہے۔
اب اس سے روزانہ چہرے کا مساج کریں ایسا کرنے سے آپ کے چہرے کی جلد نرم ملائم ہوجائے گی اور سورج کی شعاعیں بھی آپ کے رنگ کو متاثر نہیں کرسکیں گی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نوٹ : مندرجہ بالا تحریر معالج کی عمومی رائے پر مبنی ہے، کسی بھی نسخے یا دوا کو ایک مستند معالج کے مشورے کا متبادل نہ سمجھا جائے۔
