کراچی: محکمہ اسکول ایجوکیشن میں رواں مالی سال کے 7 ماہ میں ترقیاتی بجٹ 39 فی صد خرچ کیے جانے کا انکشاف ہوا ہے۔
تفصیلات کے مطابق محکمہ اسکول ایجوکیشن نے رواں مالی سال میں 599 ترقیاتی منصوبوں کے لیے 20 ارب روپے مختص کیے تھے، جنھیں نظرثانی کے بعد 19 ارب 99 کروڑ روپے کیا گیا، تاہم 11 ارب 69 کروڑ روپے جاری کیے گئے۔
معلوم ہوا ہے کہ مجموعی بجٹ میں اب تک 7 ارب 99 کروڑ روپے خرچ کیے جا سکے ہیں، اور اب باقی 5 ماہ میں 12 ارب ایک کروڑ روپے خرچ کرنے ہیں۔
اس حوالے سے سیکریٹری اسکول ایجوکیشن کی صدارت میں ہونے والے اجلاس میں ترقیاتی کام پر سست روی پر افسوس کا اظہار کیا گیا، اجلاس میں فنڈز کے اجرا کے حوالے سے مختف فیصلے کیے گئے۔
110 ترقیاتی منصوبوں کے لیے 50 کروڑ روپے مختص ہیں، ان کی مکمل رقم ایک ہی مرتبہ جاری کر دی جائے گی، 27 ترقیاتی منصوبوں پر 2 قسطوں میں رقم جاری کی جائے گی، 5 ترقیاتی منصوبوں پر 4 اقساط میں رقم جاری ہوگی۔
451 منصوبوں پر 10 کروڑ روپے کا بجٹ 4 قسطوں میں جاری کیا جائے گا، 5 منصوبوں پر 10 کروڑ روپے کی رقم چار قسطوں میں جاری کی جائے گی، ایک منصوبہ ایسا ہے جس پر انتظامی منظوری کے بعد چار قسطوں میں رقم جاری کی جائے گی۔
