کراچی: شہر قائد میں 3 روز کیلیے پانی کی فراہمی معطل کرنے کا فیصلہ کر لیا گیا جس سے مختلف علاقے متاثر ہوں گے۔
کراچی واٹر اینڈ سیوریج کارپوریشن کے مطابق لائنوں کی مرمت کے باعث 3 روز پانی کی فراہمی ضلع وسطی، شرقی اور اولڈ سٹی ایریا میں معطل رہے گی۔
ترجمان نے بتایا کہ رمضان سے قبل لیکجز کے خاتمے کیلیے پانی کی لائنوں کی مرمت کی جا رہی ہے، پیر کی رات تک پانی کی سپلائی معمول پر آنا شروع ہو جائے گی۔
اس سے قبل ایم ڈی کارپوریشن انجینئر اسداللہ خان کا کہنا تھا کہ رمضان کے دوران شہر بھر میں پانی کی بلا تعطل پانی کی فراہمی کو یقینی بنایا جائے اور ماہ صیام سے قبل پانی کی لائنوں میں رساؤ کا مکمل خاتمہ کیا جائے۔
ترجمان نے بتایا کہ منوں گوٹھ گلشن اقبال اور پیلی کوہٹی لیاقت آباد میں پانی کی متاثرہ لائنوں کا کام کیا جائے گا، ایف ٹی ایم کی 48 انچ ڈایا لائن اور سی ٹی ایم 54 انچ ڈایا لائن کا مرمتی کام آج 22 فروری ہفتے کے روز سے شروع کیا جائے گا جو اگلے 72 گھنٹوں میں مکمل ہوگا۔
انہوں نے بتایا تھا کہ مرمتی کام 24 گھنٹے مسلسل جاری رہے گا تاکہ مقررہ وقت میں مکمل ہوسکے، رساؤ کا کام مکمل ہونے سے شہر بھر میں پانی کی فراہمی میں مزید بہتر آئے گی جبکہ کام کے باعث لیاقت آباد، ناظم آباد، پاک کالونی، گولیمار، شیر شاہ، اولڈ سٹی ایریا، لانڈھی، کورنگی اور پی اے ایف بیس مسرور میں پانی کی فراہمی جزوی طور پر معطل رہے گی۔
ان کا مزید کہنا تھا کہ کراچی کو یومیہ ٹوٹل 650 ایم جی ڈی پانی فراہم کیا جاتا ہے تاہم کام کے باعث شہر کو یومیہ 250 ایم جی ڈی پانی کی کمی کا سامنا ہوگا جبکہ شہر کو 400 ایم جی ڈی پانی کی فراہمی معمول کے مطابق جاری رہے گی۔
