اداکارہ ایمن سلیم حال ہی میں شادی کے بندھن میں بندھنے والی فنکار جوڑی کبریٰ خان اور گوہر رشید کی حمایت میں بول پڑیں۔
فوٹو اور ویڈیو شیئرنگ ایپ انسٹاگرام پر اداکارہ ایمن سلیم نے گوہر رشید اور کبریٰ خان کی شادی میں ڈانس کرنے پر تنقید کرنے والے سوشل میڈیا صارفین کو آڑے ہاتھوں لے لیا۔
انہوں نے لکھا کہ ’شادی کی تقریبات ذاتی چیز ہیں، اس لیے اگر اچھی بات نہیں کہہ سکتے تو برا بھی نہیں کہنا چاہیے۔‘
ایمن سلیم نے لکھا کہ ’جب کبھی کوئی اپنی ذاتی زندگی اپنی خوشی سے جینے کی کوشش کرتا ہے تو لوگوں کو اس پر غیر ضروری تنقید کرنے سے گریز کرنا چاہیے۔‘
اداکارہ نے کہا کہ ’اگر ایک سیلیبرٹی جوڑا مقدس مقام پر نکاح کرتا ہے اور پھر اپنی مرضی اور خوشی سے اپنی شادی کا جشن منانا ہے تو اس میں آپ کو کیا تکلیف ہے؟ یہ آپ کو کس طرح متاثر کررہا ہے؟ لوگوں کے لیے دوسروں کی خوشی میں خوش رہنا اتنا مشکل کیوں ہے؟
انہوں نے کہا کہ کسی کو کسی دوسرے کے اخلاص یا ایمان پر کسی دوسرے کو سوال کرنے کا کوئی حق نہیں ہے، ایمان ہو یا جشن منانا یہ ذاتی معاملہ ہے، اگر آپ کسی کی خوشی میں خوش نہیں ہوسکتے تو اپنے کام سے کام رکھیں۔
واضح رہے کہ اداکارہ کبریٰ خان اور گوہر رشید نے مکہ مکرمہ میں سادگی سے نکاح کیا اور بعد میں پاکستان میں شیندی کی تقریب میں ڈانس کیا جس پر سوشل میڈیا صارفین کی جانب سے انہیں تنقید کا نشانہ بنایا جارہا تھا۔
