محمد عامر نے کس کے کہنے پر انٹرنیشنل کرکٹ سے ریٹائرمنٹ واپس لی تھی سابق پیسر نے کئی ماہ بعد اس کا انکشاف کر دیا۔
پاکستان کے سابق فاسٹ بولر محمد عامر جنہوں نے گزشتہ سال ٹی 20 ورلڈ کپ سے قبل انٹرنیشنل کرکٹ سے ریٹائرمنٹ واپس لے لی تھی تاہم ورلڈ کپ کے بعد انہوں نے دوبارہ ریٹائرمنٹ کا اعلان کر دیا۔
محمد عامر نے ریٹائرمنٹ واپس لینے کا فیصلہ کس کے میسج پر کیا۔ اس راز سے کئی ماہ بعد سابق فاسٹ بولر نے خود ہی پردہ اٹھا دیا۔
ایک مقامی نجی ٹی وی چینل کے پروگرام میں محمد عامر نے پروگرام میں شریک ایک شخص کے سوال پر کہا کہ ان کا انٹرنیشنل کرکٹ سے ریٹائرمنٹ لینا کسی ڈیل کا نتیجہ نہیں تھا بلکہ انہیں اور عماد وسیم کو شاہین شاہ آفریدی نے میسج کر کے ریٹائرمنٹ واپس لینے کا کہا تھا۔
سابق پیسر نے کہا کہ شاہین شاہ نے میسج کر کے کہا تھا کہ آپ کی ملک کو ضرورت ہے اور آپ ابھی پاکستان کی مزید خدمت کر سکتے ہیں۔ ٹیم میں آپ کو وہی عزت اور مقام دیا جائے گا جس کے آپ مستحق ہیں۔ ان کے کہنے پر ہی میں نے ریٹائرمنٹ واپس لی۔
انہوں نے ایک سابق کپتان کی جانب سے اس معاملے پر ڈیل کے الزام کی نفی کرتے ہوئے کہا کہ حقیقت تو یہ ہے کہ پاکستان کے لیے میں اپنی کاؤنٹی کی ڈیل چھوڑ کر واپس آیا تھا۔ ڈربی شائر کے لیے پورا سیزن کا کانٹریکٹ تھا جس کو میں نے ملک کی خاطر چھوڑا۔
محمد عامر نے یہ بھی بتایا کہ انہوں نے تو ورلڈ کپ اپنے خرچے پر کھیلا فزیو اور پوری ٹریولنگ کے اخراجات میں نے خود برداشت کیے تھے۔
چیمپئنز ٹرافی 2025 اردو خبریں
واضح رہے کہ محمد عامر نے تین سال قبل اس وقت کی پی سی بی انتظامیہ کے رویے سے بد دل ہوکر انٹرنیشنل کرکٹ سے ریٹائرمنٹ لے لی تھی۔ بعد ازاں گزشتہ سال ٹی 20 ورلڈ کپ سے قبل ریٹائرمنٹ واپس لی تاہم میگا ایونٹ کے کچھ عرصہ بعد انہوں نے ایک بار پھر ریٹائرمنٹ کا اعلان کر دیا تھا۔
چیمپئنز ٹرافی: محمد عامر نے ایسا کیا کہا کہ بھارتی صحافی وکرانت گپتا کو چپ لگ گئی؟
