پشاور: گورنر خیبر پختونخوا فیصل کریم کنڈی کا کہنا ہے کہ کے پی حکومت سندھ حکومت کے ساتھ مناظرہ کر لے۔
گورنر ہاؤس میں کسان کنونشن سے خطاب میں فیصل کریم کنڈی نے کہا کہ خیبر پختونخوا میں کام نہیں صرف باتیں چل رہی ہیں، تینوں صوبوں کے وزیر اعلیٰ کام کر رہے ہیں لیکن ہمارے صرف باتیں کر رہے ہیں۔
فیصل کریم کنڈی نے کہا کہ صوبے میں کرپشن کا بازار گرم ہے غریب پریشان ہے، بے روزگار ہونے والے 20 ہزار ملازمین کیلیے بھی کنونشن کروں گا، منگل کو بلدیاتی نمائندوں کیلیے کنونشن کروں گا۔
انہوں نے کہا کہ کسان ٹیکس کے خلاف صوبے کی سیاسی قیادت سے بھی بات کروں گا، گندم سیزن آتے ہی کرپشن کیلیے صوبائی حکومت کا مافیا نکل آتا ہے، افسوس سب سے سستی بجلی بنانے والا صوبہ لوڈشیڈنگ سے متاثر ہے۔
دو روز قبل میاں چنوں میں صحافیوں سے گفتگو میں فیصل کریم کنڈی کا کہنا تھا کہ پنجاب اور سندھ میں اسٹیڈیم دنوں میں مکمل ہوئے لیکن کے پی میں ایسا نہیں ہوا، پنجاب کے عوام نے ہمیشہ پاکستان پیپلز پارٹی کو پیار دیا، عوام کی اسی طرح محبت رہی تو جلد بلاول بھٹو زرداری پاکستان کے وزیر اعظم ہوں گے۔
گورنر کے پی نے کہا تھا کہ وزیر اعلیٰ خیبر پختونخوا اور وزیر اعلیٰ سندھ کا موازنہ کریں، سندھ کی ترقی سب سے زیادہ نظر آتی ہے، اگر علی امین گنڈاپور نے ایک انچ بھی زیادہ کام کیا تو ہمارے وزیر اعلیٰ عہدہ چھوڑ دیں گے۔
ان کا کہنا تھا کہ اڈیالہ جیل میں جو سہولیات بانی پی ٹی آئی عمران خان کو مل رہی ہیں وہ دوسروں کو بھی دیں، عمران خان کی طرح اڈیالہ جیل میں دیگر قیدیوں کو بھی دیسی گھی میں پکے مرغ دینے چاہیے، بانی پی ٹی آئی امریکا میں جا کر کہتا تھا کہ جیل سے اے سی اتروا دوں گا، اانسان کو بڑا بول نہیں بولنا چاہیے وہ پکڑ میں آ جاتا ہے۔
’آج پی ٹی آئی کی مولانا فضل الرحمان کے پیچھے نمازیں حلال ہو رہی ہیں، پی ٹی آئی کے لوگ کل سربراہ جے یو آئی (ف) سے متعلق کیا کہتے تھے؟ صوبے کے عوام بدامنی اور سہولیات نہ ہونے کی وجہ سے مایوس ہیں، 2013 میں ہم نے پرامن صوبہ پی ٹی آئی کے حوالے کیا تھا لیکن آج کے پی کی حالت دیکھ لیں کیا ہوگئی ہے۔‘
