کیتھولک عیسائیوں کے مذہبی پیشوا پوپ فرانسس جو 10 روز سے اسپتال میں داخل ہیں ان کی صحت سے متعلق نئی اپ ڈیٹ جاری کی گئی ہے۔
غیر ملکی میڈیا کے مطابق کیتھولک عیسائیوں کے مذہبی پیشوا 88 سالہ پوپ فرانسس جو خرابی صحت کی وجہ سے روم کے جیمیلی اسپتال میں زیر علاج ہیں۔ ان کی صحت سے متعلق نئی خبر یہ ہے کہ ان کی حالت بتدریج بہتر ہو رہی ہے۔
ویٹی کن کے مطابق پوپ کے گردے کا معمولی سا مسئلہ باعثِ تشویش نہیں ہے۔
ہولی سی پریس آفس کے مطابق، پوپ فرانسس کی اسپتال میں دسویں رات پُرسکون گزری وہ اچھی طرح سوئے۔
واضح رہے کہ پوپ فرانسس میں گزشتہ دنوں ڈبل نمونیا کی تشخیص ہوئی تھی اور انہیں 14 فروری کو اسپتال میں داخل کیا گیا تھا۔
پوپ فرانسس کی صحت سے متعلق ویٹی کن نے اپنے حالیہ بیان میں بتایا ہے کہ پوپ کو سانس لینے میں کسی نئے مسئلہ کا سامنا نہیں۔
اس سے قبل ڈاکٹروں نے پوپ فرانسس کی حالت کو تشویشناک قرار دیا تھا اور ان کی صحتیابی کے لیے ویٹی کن سمیت دنیا بھر میں خصوصی دعاؤں کا اہتمام کیا گیا تھا۔
اسی دوران ان کے قریبی معاونین کے مطابق پاپائے اعظم نے انہیں بتایا کہ وہ اپنی وراثت کی تیاری اور اپنے جانشین کے بارے میں سوچ بچار کررہے ہیں۔
