چیمپئنز ٹرافی میں دولہا نے اپنی شادی والے دن پاک بھارت میچ دیکھنے کے لیے وہ انوکھا قدم اٹھایا کہ باراتی پہلے حیران اور پھر خوش ہوگئے۔
پاک بھارت میچ جہاں بھی ہو شائقین کا جوش وخروش عروج پر ہوتا ہے۔ لوگ روایتی حریفوں کا میچ دیکھنے کے لیے اپنی تمام مصروفیات اور بعض تو اہم امور تک ترک کر دیتے ہیں۔ ایسے میں ایک دولہا نے اپنی شادی کے دن اس بڑے میچ کو دیکھنے کے لیے ایسا انوکھا قدم اٹھایا کہ سب حیران رہ گئے۔
چیمپئنز ٹرافی میں پاکستان بھارت سے میچ ہار کر ایونٹ سے باہر ہوگیا مگر اس میچ سے متعلق خبریں اب تک میڈیا میں گردش کر رہی ہیں۔ ایسی ہی ایک دلچسپ خبر بھارت سے سامنے آئی ہے۔
یہ دلچسپ واقعہ بھارت کے شہر عادل آباد میں پیش آیا جہاں ایک نوجوان کی 23 فروری کو شادی تھی تاہم اسی روز روایتی حریفوں پاکستان اور بھارت کے درمیان مقابلہ بھی ہونا تھا۔
دولہا اور اس کے دوست احباب کرکٹ بالخصوص پاک بھارت ٹاکرا دیکھنے کے رسیا تھے۔ اس شوق کے پیش نظر دولہے نے اپنی شادی کی تقریب میں ہال کے اندر اسٹیج کے قریب ایک بڑی اسکرین نصب کروا دی تاکہ شادی بھی متاثر نہ ہوا اور اس سمیت باراتی میچ سے بھی لطف اندوز ہو سکیں۔
دولہا کے اس فیصلے نے شادی میں شریک دوستوں اور مہمانوں کو حیران کر دیا جنہوں نے شادی کی تقریب کے ساتھ ساتھ سنسنی خیز کرکٹ میچ کا بھی لطف اٹھایا۔ شادی کی تقریب میں شریک مہمانوں کا کہنا تھا کہ یہ ایک یادگار لمحہ تھا جہاں ایک طرف خوشیوں کی محفل سجی تھی اور دوسری طرف کرکٹ کے میدان میں سنسنی خیز مقابلہ جاری تھا۔
