برطانیہ میں سونے کے ٹوائلٹ کی مشہور چوری کی فوٹیج سامنے آ گئی ہے۔
برطانوی عدالت میں سونے کے ٹوائلٹ کی چوری کے کیس کی سماعت ہوئی، آکسفورڈ کراؤن کورٹ میں 60 لاکھ ڈالر مالیت کے ٹوائلٹ چوری کی سی سی ٹی وی فوٹیج بھی دکھائی گئی، جس میں ٹوائلٹ کو چوری کرتے دیکھا جا سکتا ہے۔
برطانیہ میں سونے کے ٹوائلٹ کی چوری کا یہ ایک انوکھا واقعہ تھا جو 14 ستمبر 2019 کو بلین ہیم پیلس میں پیش آیا تھا، جہاں سے چور سونے کا ٹوائلٹ 5 منٹ میں لے اُڑے تھے، نمائش کے لیے رکھے گئے ٹوائلٹ کو اب تک تلاش نہیں کیا جا سکا ہے۔
چوری کے الزام میں گرفتار تینوں ملزمان نے صحت جرم سے انکار کیا ہے۔
ویڈیو میں چوروں کو 4.8 ملین پاؤنڈ کے سونے کے ٹوائلٹ کو چوری کرتے دیکھا جا سکتا ہے، بلین ہیم پیلس وہی محل ہے جہاں سابق برطانوی وزیر اعظم ونسٹن چرچل پیدا ہوئے تھے اور وہاں سونے کے بیت الخلا کو نمائش کے لیے رکھا گیا تھا، اس ٹوائلٹ کو علامتی بنیادوں پر استعمال بھی کیا جا سکتا تھا۔
دل چسپ بات یہ ہے کہ نمائش دیکھنے آنے والے افراد بیت الخلا استعمال کرنے کے لیے 3 منٹ کا وقت بُک کروا سکتے تھے۔
