لاہور : پرانے مینوئل اسلحہ لائسنس کی کمپیوٹرائزیشن کا عمل دوبارہ شروع کردیا گیا اور نادرا کو کمپیوٹرائزیشن کیلئے انتظامات مکمل کرنے کی ہدایت کردی ہے۔
تفصیلات کے مطابق پرانے مینوئل اسلحہ لائسنس ہولڈرز کیلئے کمپیوٹرائزیشن کا آخری موقع ہے ، پرانے مینوئل اسلحہ لائسنسز کی توثیق اور کمپیوٹرائزیشن کا عمل دوبارہ شروع کردیا گیا ہے۔
محکمہ داخلہ پنجاب نے تمام ڈویژنل کمشنرز کے نام مراسلہ جاری کردیا، جس میں نادرا کو بھی مینوئل لائسنس کی کمپیوٹرائزیشن کیلئے انتظامات مکمل کرنے کی ہدایت کی ہے۔
تصدیق کے بعد متعلقہ کمشنر یا ایڈیشنل سیکرٹری جوڈیشل اسلحہ لائسنس جاری کریں گے۔
یاد رہے محکمۂ داخلہ نے 2016ء میں بھی مینوئل اسلحہ لائسنسز کی کمپیوٹرائزیشن کا عمل شروع کیا تھا اور دسمبر 2020ء تک کمپیوٹرائزڈ نہ ہونے والے مینوئل اسلحہ لائسنس منسوخ کر دیے گئے تھے۔
ترجمان محکمۂ داخلہ پنجاب کا کہنا تھا کہ بہت سے شہری اپنے مستند اسلحہ لائسنسز کمپیوٹرائزڈ نہیں کرا سکے تھے، ایسے شہریوں کے پاس اب بھی ہتھیار اور منسوخ شدہ کتابچے موجود ہیں۔
