کراچی : شہر قائد میں ایک اور موٹر سائیکل سوار خونی ٹریلر کے پہیوں تلے آکر کچلا گیا، دوسرے واقعے میں ایک راہگیر نامعلوم گاڑی کی ٹکر سے جاں بحق ہوا۔
اے آر وائی نیوز کی رپورٹ کے مطابق کراچی کے علاقے لانڈھی فردوس چالی کے قریب تیز رفتار خونی ٹریلر کی ٹکر سے موٹر سائیکل سوار شہری کچل کر جاں بحق ہوگیا، حادثے میں موٹر سائیکل پر بیٹھا دوسرا شخص زخمی ہوگیا۔
اس حوالے سے متوفی کے اہل خانہ نے میڈیا کو بتایا کہ خونی ٹریلر کی زد میں آنے والے دونوں افراد آپس میں کزن ہیں، جاں بحق ہونے والے شخص کا نام شہباز اور زخمی ہونے والے کا نام شاہ میر ہے۔
اہل خانہ کے مطابق دونوں کزن مہران ٹاؤن سے بھینس کالونی بھتیجی کو چھوڑ کر واپس آرہے تھے کہ حادثہ ہوگیا۔
یہ اندوہناک حادثہ داؤد چورنگی لانڈھی میں پیش آیا، متوفی شہباز ضلع میر پور خاص تحصیل ڈگری گاؤں دیال گڑھ کا رہائشی تھا۔
دوسرے واقعے میں پرانی سبزی منڈی کے قریب نامعلوم گاڑی کی ٹکر سے ایک راہگیر کے جاں بحق ہونے کا واقعہ پیش آیا ہے، ریسکیوحکام کا کہنا ہے کہ فی الحال راہگیر کی شناخت نہیں ہو سکی ہے، لاش کو قانونی کارروائی کیلیے اسپتال منتقل کردیا گیا ہے۔
