کراچی : مصطفیٰ عامر قتل کیس میں پولیس تفتیش کے دوران ملزم ارمغان کے بار بار بے ہوشی کا ڈرامہ کرنے کا انکشاف ہوا، رپورٹ میں بتایا گیا ملزم بار بار اپنے بیان تبدیل کررہا ہے۔
تفصیلات کے مطابق انسداد دہشت گردی منتظم عدالت میں مصطفی عامر کے اغواء اور قتل کیس میں اہم پیش رفت سامنے آئی۔
پولیس کی ملزم شیراز کے جوڈیشل مجسٹریٹ کے روبرو اقبالی بیان ریکارڈ کرانے کی تیاری کرلی گئی، پولیس نے کیس تحقیقات کے لئے خصوصی کمیٹی تشکیل دینے کے حوالے سے عدالت کو آگاہ کردیا اور پولیس کی جانب سے پیش کردہ رپورٹ حاصل کرلی۔
پولیس کی جانب سے انسداددہشت گردی عدالت میں پیش کردہ رپورٹ سامنے آگئی، جس میں پولیس تفتیش کے دوران ملزم ارمغان کے بار بار بیہوشی کا ڈرامہ کرنے کا انکشاف کیا۔
ریمانڈ رپورٹ میں بتایا گیا کہ زوما نامی لڑکی سے تفتیش کرکے دیگر ساتھیوں کو گرفتار کرنا ہے، تفتیش میں ملزم شیراز نے بخوبی اپنے جرم کا اعتراف کیا ہے۔
رپورٹ میں کہنا تھا کہ ملزم ارمغان نہایت شاطر، چالاک اور عادی جرائم پیشہ ہے، ملزم ارمغان بار بار اپنے بیان تبدیل کررہا ہے، ملزم ارمغان بار بار بیہوش ہونے کی ایکٹنگ کرتا ہے،ملزم شیراز کا ویڈیو بیان بھی ریکارڈ کرایا گیا ہے۔
ریمانڈ رپورٹ میں مزید بتایا گیا کہ مقتول مصطفیٰ کا ڈی این اے والدہ کے ڈی این اے سےمیچ ہوگیا، ڈی این اے میچ ہونے سے ثابت ہوتا ہے لاش مصطفیٰ عامر کی ہے۔
ملزم شیراز کا متعلقہ مجسٹریٹ کےروبرو اقبالی بیان ریکارڈ کرانا ہے، ایک خصوصی کمیٹی بھی تشکیل دی گئی ہے جو ملزمان سےتفتیش کرےگی۔
ارمغان کےدیگر مقدمات کی معلومات کیلئےافسران کولیٹر بھیجےہیں، ملزم کال سینٹراورسافٹ ویئرہاؤس چلارہا تھا اور دیگرغیر قانونی سرگرمیوں بھی ملوث ہے، تفتیش کرکے غیر قانونی سرگرمیوں کی معلومات بھی حاصل کرنی ہے۔
