ایک 14 سالہ بچہ ایک دو نہیں بلکہ 13 سکے نگل گیا ڈاکٹروں نے بروقت کامیاب آپریشن کرتے ہوئے اس کی جان بچا لی۔
یہ واقعہ مصر میں پیش آیا جہاں منصورہ یونیورسٹی کے چلڈرن اسپتال میں ایک ایسا بچہ لایا گیا جس کے پیٹ میں شدید درد ہو رہا تھا۔
غیر ملکی میڈیا کے مطابق یہ بچہ جس کی عمر لگ بھگ 14 برس بتائی جاتی ہے، شدید درد میں تڑپتا ہوا اسپتال لایا گیا تھا۔
بچے کا جب ایکسرے کیا گیا تو اس کی غذائی نالی میں سکوں کی موجودگی کا پتہ چلا۔
یہ معلوم ہوتے ہی اینڈو اسکوپی یونٹ کے سربراہ ڈاکٹر محمد ایز نے اس کا آپریشن کرنے کا فیصلہ کیا اور کامیاب سرجری کرتے ہوئے تمام سکے نکال لیے۔
بچے کے پیٹ سے جب سکے نکالے گئے تو سب دیکھ کر حیران رہ گئے کہ یہ سکے ایک یا دو نہیں بلکہ 13 تھے جس کی وجہ سے بچہ شدید درد میں تڑپ رہا تھا۔
رپورٹ کے مطابق بچے کو آپریشن کے بعد انتہائی نگہداشت یونٹ میں منتقل کر دیا گیا ہے اور مکمل صحتیابی کے بعد اس کو اسپتال سے فارغ کیا جائے گا۔
