کراچی : پریڈی تھانے پر کریکر سے حملہ کیا گیا ہے جس کے نتیجے میں 3پولیس اہلکار زخمی ہوئے ہیں، تاہم خوش قسمتی سے کسی جانی نقصان کی اطلاع نہیں ملی۔
اے آر وائی نیوز کی رپورٹ کے مطابق کراچی کے علاقے صدر میں پریڈی تھانے پر نامعلوم افراد نے کریکر سے حملہ کیا جس کے نتیجے میں 3 پولیس اہلکار زخمی ہوگئے جنہیں فوری طبی امداد کیلیے جناح اسپتال منتقل کیا گیا۔
اس حوالے سے ایس ایس پی ساؤتھ نے میڈیا کو بتایا کہ 2 اہلکار معمولی زخمی ہیں تاہم ایک اہلکار کی آنکھ کے پاس چھرّا لگا ہے جس کی حالت تشویشناک ہے۔
پولیس حکام کے مطابق نامعلوم ملزمان کی جانب سے پھینکا گیا کریکر پریڈی تھانے کے احاطے میں گرا، دھماکے سے مرکزی دروازے کے قریب کھڑی گاڑی کے شیشے ٹوٹ گئے۔
کریکر دھماکے سے تھانے کی دیوار پر نشانات پڑگئے، واقعے کے فوری بعد بم ڈسپوزل اسکواڈ کو طلب کرلیا گیا، کرائم سین یونٹ نے موقع پر پہنچ کر شواہد اکٹھے کرناشروع کردیے۔
پریڈی تھانے پر کریکرحملے کی سی سی ٹی وی اے آر وائی نیوز کو موصول ہوگئی، فوٹیج میں دیکھا جاسکتا ہے کہ پریڈی تھانے پر نامعلوم افراد نے کریکر پھینکا۔
موٹر سائیکل سوار ملزمان کریکر پھینک کر فرار ہوئے جو تھانے میں ڈیوٹی افسر کے کمرے کے باہر گرا،
زخمی اہلکاروں کی شناخت ارشد عامر اور ریاض کے ناموں سے ہوئی ہے۔
ایس ایس پی ساؤتھ مہزور علی نے میڈیا سے گفتگو کرتے ہوئے بتایا کہ آج دوپہر 12بج کر16منٹ پر تھانے کے اندر ایک گرنیڈ پھینکا گیا۔
انہوں نے بتایا کہ حملے میں ہمارے3جوان زخمی ہیں، آر جی ڈی5گرنیڈ سےتھانے پر حملہ کیا گیا ہے، تینوں سپاہی اس وقت جائے وقوعہ پر موجود تھے جو زخمی ہوئے۔
ایس ایس پی ساؤتھ کے مطابق ابھی تک کسی تنظیم نے ذمہ داری قبول نہیں کی ہے، کیمروں کی فوٹیج کے ذریعےحملہ آوروں تک پہنچیں گے، واقعے سے متعلق مزید تفصیلات جمع کی جارہی ہیں۔
مزید پڑھیں : گلستان جوہر تھانے پر 80 سے زائد افراد کا حملہ، مقدمہ درج
یاد رہے کہ گزشتہ سال مئی میں کراچی میں گلستان جوہر تھانے پر 80 سے زائد افراد نے حملہ کردیا تھا، پولیس کا کہنا ہے کہ 3 کباڑیوں کو چوری کا مال خریدنے پرحراست میں لیا گیا تھا، ملزمان چھڑانے کیلئے کباڑیوں کے صدر اقبال رند کی سربراہی میں تھانے پر حملہ کیا گیا۔
پولیس حکام کے مطابق لاٹھی چارج کے بعد حملہ آور منتشر ہوگئے، جبکہ 6 کباڑیوں کو گرفتار کرلیا گیا ہے۔ واقعے کے 2 مختلف مقدمات تھانہ گلستان جوہر میں درج کئے گئے۔
