اسلام آباد: پاکستان میں سوائن فلو کے خطرے کے پیش نظر وزارت صحت نے محتاط رہنے کا مشورہ دیا ہے ۔ جس کے ساتھ ہی اسپتالوں میں انتظامات کی ہدایت بھی جاری کردی گئیں۔
پاکستان پر سوائن فلو کا خطرہ منڈلانے لگا، وزارت قومی صحت نے ایڈوائزری جاری کردی، ایڈوائزری میں تمام اسپتالوں میں انتظامات کو حتمی شکل دینے کی ہدایت جاری کیں ہیں ۔
وزارت صحت کے مطابق ملکی سرحدوں ،ہوائی اڈوں ،بندرگاہوں پر بھی محکمہ صحت کے عملے کو ہوشیار کردیا گیا ہے جبکہ صوبائی اور ضلعی سطح پر بھی انفلو ئنزا ٹاسک فورس کو فعال کرنے کی ہدایت کی گئی ہے۔
ایڈوائزری میں کہا گیا ہے کہ مشتبہ مریض کی نگرانی کے حوالے سے مجوزہ طریقہ کار پر عمل کیا جائے اور متعلقہ ادویات کی فراہمی کو یقینی بنایا جائے ۔
وزارت قومی صحت نے سوائن فلو سے بچنے کے لیے تجاویز بھی جاری کیں ہیں جس میں صفائی اورمتاثرہ مریض سے فاصلہ رکھنے کی ہدایت کی گئی ہے ۔
