لاہور: وزیر اطلاعات و نشریات عظمیٰ بخاری نے ترجمان خیبر پختونخوا حکومت بیرسٹر سیف کے اس بیان پر اپنے ردعمل کا اظہار کر دیا جس میں ان کا کہنا تھا کہ اڈیالہ جیل میں بانی پی ٹی آئی اور ان کی اہلیہ کو سحری و افطار نہیں دی جا رہی۔
عظمیٰ بخاری نے ردعمل میں کہا کہ عمران خان اور بشریٰ بی بی کو اڈیالہ جیل میں کھانا نہ دینے کا بیان بے بنیاد ہے، دونوں کو معمول کے مطابق کھانے پینے کے لوازمات دیے جا رہے ہیں۔
یہ بھی پڑھیں: مریم نواز پر تنقید کے بعد عظمیٰ بخاری سابقہ حکومت کے اشتہارات نکال لائیں
صوبائی وزیر اطلاعات نے کہا کہ دوپہر 12 بجے اٹھنے والا شخص روزہ کیسے رکھ سکتا ہے؟ عمران خان کو ہفتے میں 3 دن گوشت، سبزیاں، دالیں اور چقندر کا جوس مل رہا ہے، ان کو کافی، ابلے ہوئے انڈے اور خشک میوہ جات کھانے کو ملتے ہیں۔
انہوں نے کہا کہ سابق خاتون اوّل بشریٰ بی بی کا کھانے کو جو دل چاہتا ہے وہ مہیا کیا جاتا ہے، پشاور میں بیٹھے ایک شخص کو خواب آیا کہ ان کے آقا کو جیل میں کھانا نہیں مل رہا، 2 روز قبل ان کی جماعت کے ترجمان نے بھی عمران خان کی بیماری سے متعلق جھوٹ بولا، کل پمز کے 4 سینئر ڈاکٹرز کی ٹیم نے آدھا گھنٹہ تفصیلی طبی معائنہ کیا اور بانی پی ٹی آئی کو مکمل صحت مند قرار دیا۔
عظمیٰ بخاری کا مزید کہنا تھا کہ جب ان کے پاس کوئی کارڈ نہیں بچتا تو مظلومیت اور ہمدردی کارڈ کھیلنا شروع کر دیتے ہیں۔
