بانی پی ٹی آئی کی ہمشیرہ علیمہ خانم کا کہنا ہے کہ افواہ پھیلائی گئی کہ بانی کے دماغ میں انفیکشن پھیل گیا حالانکہ وہ بالکل ٹھیک ٹھاک اور خوش ہیں۔
اے آر وائی نیوز کے مطابق بانی پی ٹی آئی سے جیل میں ملاقات کے بعد علیمہ خانم نے میڈیا سے گفتگو کرتے ہوئے کہا کہ بشریٰ بی بی کو مجھ پر دباؤ ڈالنے کے لیے گرفتار کیا گیا، بانی نے پوچھا دباؤ ڈال کر کونسی ڈیل چاہتے ہیں۔
انہوں نے کہا کہ عمران خان نے ارباب نیاز اسٹیڈیم کا نام تبدیل کرنے کا فیصلہ واپس لینے کی ہدایت بھی کی۔
اس سے قبل سلمان اکرم راجہ نے اپنے بیان میں کہا تھا کہ بیرسٹر سیف کے غیر ذمہ دارانہ بیان پر شیخ وقاص اکرم سے پوچھا جائے، باتیں کی گئیں کہ عمران خان کی صحت ٹھیک نہیں لیکن ان کی صحت بالکل ٹھیک ہے۔
یہ بھی پڑھیں: دوپہر 12 بجے اٹھنے والا شخص روزہ کیسے رکھ سکتا ہے؟ عظمیٰ بخاری
ان کا کہنا تھا کہ عمران خان کو پارٹی سے کوئی شکایت نہیں بلکہ انہوں نے کہا کہ لیڈرشپ پر حملہ بھگوڑے کر رہے ہیں، بانی پی ٹی آئی نے چوہدری ظہیر عباس کو جیل معاملات دیکھنے کی ذمہ داری دی ہے، فیصل چوہدری کو ہدایت ہے کہ تمام پٹیشنز چوہدری ظہیر عباس کے سپرد کر دیں۔
سلمان اکرم کا کہنا تھا کہ کچھ لوگوں نے وکالت کے ذریعے سیاسی قد بڑھانے کی کوشش کی، عمران خان نے جس کو ذمہ داری دی اس کو سیاست کرنی چاہیے، بانی پی ٹی آئی نے نیاز اللہ نیازی کو ترجمان بنایا ہے جبکہ بشریٰ بی بی نے اپنے 4 فوکل پرسن مقرر کیے ہیں۔
