اسلام آباد: وزیر اعظم شہباز شریف نے وفاقی کابینہ ارکان کو قلمدان سونپنے سے قبل صلاح مشورے شروع کر دیے۔
قلمدانوں کا فیصلہ کرنے کیلیے وزیر اعظم نے وفاقی وزرا مصدق ملک، اویس لغاری، طلال چوہدری اور عبدالرحمان کانجو سے الگ الگ ملاقاتیں کیں اور ان کو ذمہ داریوں سے متعلق آگاہ کر دیا۔
شہباز شریف نے بعض پرانے وزرا کے قلمدانوں میں بھی رد و بدل کا عندیہ دیا۔ وفاقی وزرا کو ایک سے زائد وزارت کے قلمدان چھوڑنا ہوں گے جبکہ اہم وزارتوں میں وفاقی وزیر کے ساتھ وزیر مملکت بھی مقرر کیا جائے گا۔
ذرائع کے مطابق وزیر اعظم پیٹرولیم، توانائی، موسمیاتی تبدیلی اور فوڈ سکیورٹی وزرا کو تبدیل کرنے کے خواہاں ہیں، نجکاری، سرمایہ کاری اور اسٹیبلشمنٹ کے وزیروں کی تبدیلی بھی متوقع ہے۔
ذرائع نے بتایا کہ احد چیمہ کہ جگہ توقیر شاہ کو بیوروکریسی کی ذمہ داری ملے گی، احد چیمہ کو اقتصادی امور ڈویژن کی ذمہ داری دینے پر بھی مشاورت ہوئی۔
اختیار ولی نے پرویز خٹک سے متعلق اپنے خدشات وزیر اعظم کے سامنے رکھ دیے، شہباز شریف نے اختیار ولی کو ساتھ لے کر چلنے کی یقین دہانی کروائی اور ان کو اسلام آباد میں ہی قیام کرنے کی ہدایت کی۔
