وزارت داخلہ غیرقانونی مقیم غیرملکیوں کو واپس بھیجنے کا فیصلہ کرلیا گیا ہے۔
اے آر وائی نیوز کے مطابق وزارت داخلہ نے غیرقانونی مقیم اور افغان سٹیزن کارڈ ہولڈرز کو پاکستان چھوڑنے کی ڈیڈ لائن دے دی۔
وزارت داخلہ کا کہنا ہے کہ غیرقانونی مقیم افراد، افغان سٹیزن کارڈ ہولڈر کو 31 مارچ تک پاکستان چھوڑنے کا حکم دیا ہے۔
غیرقانونی مقیم غیرملکیوں کو یکم اپریل سے پاکستان بدر کیا جائے گا، وطن واپسی کے عمل کے دوران غیرملکیوں سے بہتر سلوک کیا جائے گا۔
وزارت داخلہ کا کہنا ہے کہ واپس جانے والوں کے لیے خوراک، صحت کی دیکھ بھال کے انتظامات کرلیے۔
حکام کا کہنا ہے کہ پاکستان افغان مہاجرین کے لیے مہربان میزبان رہا ہے، پاکستان ذمہ دار ریاست کے طور پر وعدے، ذمہ داریاں پوری کررہا ہے۔
وزارت داخلہ کا کہنا ہے کہ پاکستان میں رہنے والے غیرملکیوں کو قانونی تقاضے پورے کرنا ہوں گے۔
